وفاقی وزیرِ داخلہ محسن نقوی دا نیشنل پولیس بیورو دا دورہ، ملک بھر کیتے یکساں تے آن لائن ’پولیس کریکٹر سرٹیفکیٹ‘ دی اصولی منظوری

اسلام آباد۔ 4 اگست (اے پی پی) وفاقی وزیرِ داخلہ محسن نقوی نیشنل پولیس بیورو دا اہم دورہ کیتا تے اعلیٰ سطح دے اجلاس دی صدارت کیتی۔ ایں موقع تے انھاں عوام دی سہولت کیتے ہک وݙا تے اہم فیصلہ کریندیں ہوئیں ملک بھر کیتے یکساں پولیس کریکٹر سرٹیفیکیٹ حاصل کرݨ دے نظام دی اصولی منظوری ݙے ݙتی اے۔ انھاں ݙسایا جو ہݨ نیشنل پولیس بیورو دے ذریعے پولیس کلیرنس سرٹیفیکیٹ جاری کیتا ویسے جئیں توں ایں دے حصول دا سابقہ پیچیدہ عمل ختم تھی تے انتہائی تیز تے مکمل طور تے آن لائن تھی ڳئے۔ شہری ہݨ گھر ٻیٹھے نیشنل پولیس بیورو پورٹل دے ذریعے آسانی نال آپݨا کریکٹر سرٹیفیکیٹ حاصل کر سڳسن۔ وزیرِ داخلہ دا آکھݨ ہئی جو پولیس کلیئرنس سرٹیفیکیٹ دے ایں یکساں تے آن لائن نظام توں خصوصاً بیرونِ ملک ونڄݨ آلے پاکستانی شہریاں کوں شدید درپیش مشکلاں توں نجات ملسی اتے انھاں کیتے تمام مراحل آسان تھی ویسن۔ ایں دے نال ای انھاں انٹرنیشنل ڈرائیونگ پرمٹ کیتے وی ملک گیر سطح تے ہک یکساں نظام وضع کرݨ دی ہدایت جاری کیتی تانجو بیرونِ ملک سفر کرݨ آلیاں کوں ہر ممکن سہولت میسر آ سڳے۔ محسن نقوی ایں عزم دا اعادہ کیتا جو نیشنل پولیس بیورو کوں ہک جدید، فعال تے متحرک ادارہ بݨاوݨ حکومت دی اولین ترجیح اے۔ دورے دے دوران ڈی جی نیشنل پولیس بیورو وفاقی وزیر کوں ادارے دی کارکردگی تے مختلف شعبہ جات تے تفصیلی بریفنگ ݙتی جڈانجو وزیرِ داخلہ بیورو دی عمارت دی تزئین و آرائش دے کم دا معائنہ وی کیتا۔ اجلاس دے دوران یومِ پولیس شہداء دی مناسبت نال ملک اچ امن و امان دے قیام تے جرائم دے خاتمے کیتے جاناں قربان کرݨ آلے تمام پولیس شہداء کوں زبردست ہدیہِ عقیدت پیش کیتا ڳیا۔ وزیرِ داخلہ محسن نقوی پولیس شہداء دیاں عظیم قربانیاں کوں خراجِ تحسین پیش کریندیں ہوئیں آکھیا جو شہداء اساݙے سراں دے تاج ہن تے اساں تاقیامت وی انھاں دا احسان نئی لہا سڳدے۔ انھاں ایں ڳالھ تے زور ݙتا جو پولیس شہداء دیاں قربانیاں کوں ہمیشہ یاد رکھیا ویسے تے پوری قوم انھاں دے خانداناں دے نال شانہ بشانہ کھڑی اے اتے ہمیشہ کھڑی رہسی۔