پاکستان کݙاہیں ناکام نی تھی سڳدا، نینگر کاکروچ نی بلکہ شاہین ہن، وفاقی وزیر احسن اقبال

اسلام آباد۔ 4 اگست (اے پی پی) وفاقی وزیر منصوبہ بندی، ترقی، اصلاحات و خصوصی اقدامات پروفیسر احسن اقبال آکھیا جو علامہ اقبالؒ دے فلسفہِ خودی تے قائدِ اعظم محمد علی جناحؒ دے وژن تے استوار اساݙیاں فکری بنیاداں ایں حقیقت دیاں عکاس ہن جو پاکستان کݙاہیں ناکام نی تھی سڳدا۔سماجی رابطے دی ویب سائٹ ایکس تے اپݨے ہک پیغام اچ انھاں آکھیا جو ملک دا نظام کیں انہدام دا شکار نی بلکہ ہک جامع، مربوط تے پائیدار قومی اصلاحات دے دور اچ داخل تھی چکئے۔ انھاں آکھیا جو اڄ دی ساریں توں وݙی ضرورت اے ہے جو قوم بالخصوص نوجوان نسل، اپݨی فکری بنیاداں کوں تکڑا کرے تے علامہ اقبالؒ دے افکار دی روشنی اچ اپݨی خودی کوں بیدار کرے۔ انھاں آکھیا جو اوکھے حالات اچ مایوسی کھنڈاوݨ آلیں کوں واضح پیغام ݙیوݨ چاہنداں جو پاکستان دے نوجوان کاکروچ نی بلکہ شاہین ہن، ایہے باصلاحیت نینگر اساݙا حال وی ہن تے روشن مستقبل وی۔وفاقی وزیر آکھیا جو حکومت نوجواناں کوں قومی ترقی دے مرکزی دھارے اچ گھن آوݨ کیتے عملی اقدامات کریندی پئی اے۔ ”اُڑان پاکستان“ دے جامع معاشی فریم ورک دے تحت نوجواناں کوں مصنوعی ذہانت، ڈیجیٹل مہارتاں، جدید ٹیکنالوجی تے مستقبل دے تقاضں نال ہم آہنگ کیتا ویندا پئے تاں جو او عالمی سطح تے موثر کردار ادا کرسڳن۔ احسن اقبال آکھیا جو پاکستان دی 25 کروڑ عوام دی فلاح، پائیدار معاشی ترقی تے ہک ٹریلین ڈالر معیشت دا ہدف صرف اجتماعی کوششاں، قومی اتحاد، مسلسل محنت تے اتفاقِ رائے دے ذریعے ہی حاصل کیتا ونڄ سڳدے۔ انھاں آکھیا جو حکومت اصلاحات، تعلیم، ٹیکنالوجی، برآمدات تے انسانی وسائل دی ترقی تے خصوصی توجہ ݙیندی پئی اے تاں جو پاکستان کوں ترقی یافتہ تے خوشحال ملکاں دی صف اچ شامل کیتا ونڄ سڳے