پولیس دے شہداء وطن اتے شہریاں دے تحفظ، قانون دی بالادستی اتے امن و امان کیتے اہم کردار ادا کیتے، وزیراعظم

اسلام آباد۔ 4 اگست(اے پی پی)وزیراعظم محمد شہباز شریف یومِ شہدائے پولیس تے اپݨے سنیہے اچ حکومتِ پاکستان اتے عوام ولوں پولیس دے جانباز افسراں اتے اہلکاراں کوں خراجِ عقیدت پیش کریندے آکھیے جو پولیس دے شہداء دیاں قربانیاں شہریاں دے جان و مال دے تحفظ، قانون دی بالادستی اتے امن و امان کیتے اہم کردار ادا کیتے، شہداء دے خانداناں دی فلاح و بہبود اتے ہر ممکن معاونت کرݨ ساݙی ترڄیح اے۔ وزیراعظم پولیس دے افسراں اتے جواناں دیاں قربانیاں کوں سلام پیش کریندے آکھیے جو ملک اچ دہشت گردی، انتہاپسندی اتے جرائم دے خلاف جنگ اچ پولیس ہمیشہ ہراول دستے دا کردار ادا کیتے اتے غیر متزلزل عزم ݙکھائے، اڄ یومِ شہدائے پولیس تے اساں اپݨے شہداء دے اہل خانہ دے صبر، استقامت اتے حوصلے کوں وی خصوصی سلام پیش کریندے ہیں، انھاں دیاں قربانیاں پوری قوم دیاں مشترکہ قربانیاں ہین، شہداء دے خانداناں دی فلاح و بہبود اتے ہر ممکن معاونت یقینی ٻݨاوݨ حکومت دی پہلی ذمہ داری اے، شہداء دے اہل خانہ کوں معیاری تعلیم، صحت دیاں بہترین سہولیات اتے ٻئے فلاحی اقدامات کرݨ دی پوری کوشش کریندے پئے ہیں۔ انھاں آکھیا جو آئو اساں سب مل تے قانون دی بالادستی، انصاف دے تحفظ، دہشت گردی اتے جرائم دے ناسور کوں مکاوݨ اتے اپݨے شہداء دی عظیم قربانیاں دے شایانِ شان ہک پرامن، محفوظ اتے خوشحال پاکستان دی تعمیر کیتے مشترکہ کوششاں اتے پختہ عزم کروں۔