جموں و کشمیر دا جھیڑا جنوبی ایشیا اچ امن و استحکام کیتے بنیادی تے پُراݨا حل طلب مسئلہ اے، پاکستان کشمیری عوام دی سفارتی، سیاسی تے اخلاقی حمایت جاری رکھیسی، وزیراعظم محمد شہباز شریف دا یومِ استحصال دے موقع تے پیغام

اسلام آباد۔ 5 اگست (اے پی پی) وزیراعظم محمد شہباز شریف کشمیری بھراواں تے بھیݨاں دے نال غیر متزلزل یکجہتی دا اظہار کریندیں آکھیا جو جموں و کشمیر دا جھیڑاجنوبی ایشیا اچ امن و استحکام کیتے بنیادی تے پُراݨا حل طلب مسئلہ اے ،خطے اچ پائیدار امن طاقت دے استعمال یا یکطرفہ اقدامات نال نی بلکہ کشمیری عوام دیاں اُمنگاں تے اقوامِ متحدہ دی سلامتی کونسل دیاں متعلقہ قرارداداں موجب جھیڑے دے منصفانہ تے پرامن حل نال ہی ممکن اے، پاکستان کشمیری عوام دی سفارتی، سیاسی تے اخلاقی حمایت جاری رکھیسی تے انھاں دی آواز کوں ہرعلاقائی تے بین الاقوامی فورم تے پوری قوت نال اُچا کریندا رہسی۔ وزیراعظم دفتر دے میڈیا ونگ توں یومِ استحصال دے موقع تے جاری پیغام اچ وزیراعظم آکھیا جو اڄ یومِ استحصال دے موقع تے حکومتِ پاکستان تے پوری پاکستانی قوم اپݨے کشمیری بھراواں تے بھیݨاں دے نال بھرپور انداز اچ غیر متزلزل یکجہتی دا اظہار کریندی اے، اساں ایں ݙینھ کوں ایں عزم دے نال منیندوں جو دنیا کوں بھارت دے 5 اگست 2019ء دے انھاں غیر قانونی تے یکطرفہ اقدامات دی سنگینی دی یاد دہانی کرائی ونڄے جیں دے ذریعے ایں غیر قانونی طور تے بھارت دے زیرِ قبضہ جموں و کشمیر دی بین الاقوامی سطح تے منیے ڳئی متنازعہ حیثیت کوں بدالݨ دی کوشش کیتی، اے اقدامات بین الاقوامی قانون تے اقوامِ متحدہ دی سلامتی کونسل دیاں متعلقہ قرارداداں دی صریحاً خلاف ورزی ہن۔وزیرِاعظم آکھیا جو سَت سال گزرݨ دے باوجود اے غیر قانونی اقدامات نہ تاں جموں و کشمیر دی قانونی حیثیت بدال سڳئن تے نہ ہی کشمیری عوام دے اپݨے جائز حقِ خودارادیت حاصل کرݨ دے عزمِ پختہ کوں کمزور کر سڳئن، انھاں اقدامات بھارتی ریاستی جبر اچ ودھارا کیتا، بنیادی آزادیاں کوں محدود کیتا تے غیر قانونی قانون سازی و انتظامی اقدامات دے ذریعے مقبوضہ علاقے دے آبادیاتی تناسب کوں بدالݨ دیاں مکروہ کوششاں کوں مزید تکھا کیتا۔وزیرِاعظم آکھیا جو بھارت دے زیرِ تسلط جموں و کشمیر اچ عوام دی حقیقی سیاسی قیادت کوں مسلسل دٻاوݨ، شہری آزادیاں تے قدغناں لاوݨ تے آزاد ذرائعِ ابلاغ تے پابندیاں برقرار رکھݨ شدید تشویش دا باعث اے، انھاں ساری اوکھ دے باوجود کشمیری عوام دا حوصلہ، استقامت تے ثابت قدمی اڄ وی غیر متزلزل اے، اپݨے ناقابلِ تنسیخ حق، حقِ خودارادیت حاصل کرݨ کیتے انھاں دی پرامن تے منصفانہ جدوجہد اڄ وی نسلاں کیتے مشعلِ راہ اے، کشمیریاں دی مثالی جدوجہد انصاف، انسانی وقار تے بین الاقوامی قانون دی بالادستی تے یقین رکھݨ آلے سارے لوکاں تے اقوام دی حمایت تے احترام دی مستحق اے۔وزیراعظم آکھیا جو جموں و کشمیر دا جھیڑا جنوبی ایشیا اچ امن و استحکام کیتے ساریں توں بنیادی تے پراݨا حل طلب مسئلہ اے، خطے اچ پائیدار امن، طاقت دے استعمال یا یکطرفہ اقدامات نال نی بلکہ کشمیری عوام دیاں اُمنگاں تے اقوامِ متحدہ دی سلامتی کونسل دیاں متعلقہ قرارداداں موجب ایں جھیڑے دے منصفانہ تے پرامن حل نال ہی ممکن اے۔وزیرِاعظم آکھیا جو بین الاقوامی برادری کوں محض تشویش دے اظہار تئیں محدود رہݨ دے بجائے ایں جھیڑے دے منصفانہ تے دیرتئیں حل کیتے اپݨا موثر تے ذمہ دارانہ کردار ادا کرݨا پوسی، ایں موقع تے میں ہک واری ول ایں ڳالھ دا اعادہ کرینداں جو جموں و کشمیر دے جھیڑے دا منصفانہ تے پرامن حل پاکستان دی خارجہ پالیسی دا بنیادی ستون اے۔ پاکستان کشمیری عوام دی سفارتی، سیاسی تے اخلاقی حمایت ہر سطح تے جاری رکھیسی تے انھاں دی آواز کوں ہر علاقائی تے بین الاقوامی فورم تے پوری قوت نال چیندا رہسی۔وزیراعظم آکھیا جو پاکستان بین الاقوامی برادری توں مطالبہ کریندے جو او بھارت تے زور ݙیوے جو او غیر قانونی طور تے بھارت دے زیرِ قبضہ جموں و کشمیر اچ انسانی حقوق دیاں سنگین خلاف ورزیاں بَند کرے، اگست 2019ء توں نافذ کیتے ڳئے اپݨے غیر قانونی تے یکطرفہ اقدامات واپس گھنے، جموں و کشمیر دے عوام تے مسلط جابرانہ قوانین دا خاتمہ کرے تے ایجھا سازگار ماحول پیدا کرے تاں جو کشمیری عوام اقوامِ متحدہ دی سلامتی کونسل دیاں متعلقہ قرارداداں موجب اپݨے حقِ خودارادیت کوں آزادانہ طور تے استعمال کریندیں جموں و کشمیر دے جھیڑے دے پرامن تے منصفانہ حل دا رستہ ہموار کرسڳن۔