پنج اگست 2019ء دے بعد دے بھارتی اقدامات بدستور گہری تشویش دا باعث ہن، نائب وزیرِ اعظم اسحاق ڈار دا یومِ استحصال دے موقع تے سنیھا

اسلام آباد۔ 5 اگست (اے پی پی) نائب وزیرِ اعظم اتے وزیرِ خارجہ سینیٹر محمد اسحاق ڈار آکھیا جو بھارت 5 اگست 2019ء کوں اپنے غیر قانونی زیرِ تسلط جموں و کشمیر اچ ہکپاسہ تے غیر قانونی اقدامات دا ہک سلسلہ اختیار کیتا۔ انھاں اقدامات دا مقصد ایں خطے دی بین الاقوامی سطح تے تسلیم شدہ متنازعہ حیثیت کوں تبدیل کرݨ اتے کشمیری عوام دے حقوق تے امنگاں کوں مجروح کرݨا ہئی، 5 اگست 2019ء دے اقدامات تے انھاں دے بعد کیتے ونڄݨ آلے اقدامات بدستور گہری تشویش دا باعث ہن۔ بدھ کوں یومِ استحصال دے موقع تے آپݨے سنیھے اچ انھاں آکھیا جو اے اقدامات جموں کشمیر دے تنازعے نال متعلق قائم شدہ بین الاقوامی قوانین تے فریم ورک دی خلاف ورزی ہن اتے انھاں دے نتیجے اچ خطے دے عوام کوں درپیش مشکلات اچ ٻیا اضافہ تھیے۔ نائب وزیراعظم آکھیا جو 5 اگست 2019ء دے اقدامات تے انھاں دے بعد کیتے ونڄݨ آلے بھارتی اقدامات بدستور گہری تشویش دا باعث ہن، انھاں اقدامات جنوبی ایشیا اچ امن تے استحکام دے فروغ دیاں کوششاں کوں ٻیا پیچیدہ بݨا ݙتے۔ انھاں آکھیا جو اساں ہک واری ولا ایں عزم دا اعادہ کریندوں جو جنوبی ایشیا اچ پائیدار امن تے استحکام صرف اوں ویلھے ممکن اے جݙݨ جموں و کشمیر دے تنازعے کوں کشمیری عوام دی امنگاں تے اقوامِ متحدہ دی سلامتی کونسل دی متعلقہ قرار داداں دے مطابق حل کیتا ویسے۔انھاں آکھیا جو اساں ہر بین الاقوامی فورم تے کشمیری عوام دے حقوق کیتے آپݨی آواز بلند کریندے رہسوں اتے تنازعے دے منصفانہ تے پرامن تصفیے کیتے کیتی ونڄݨ آلی تمام کوششاں دی حمایت جاری رکھیسوں۔ پاکستان کشمیری عوام تے انھاں دے جائز حقِ خودارادیت حاصل کرݨ دی منصفانہ جدوجہد کیتے اپݨی غیر متزلزل اخلاقی، سیاسی تے سفارتی حمایت جاری رکھیسی۔ انھاں آکھیا جو اساں بین الاقوامی برادری، بالخصوص اقوامِ متحدہ تے زور ݙیندوں جو او آپݨی طویل عرصے توں زیرِ التوا ذمہ واریاں کوں پورا کرے اتے جموں و کشمیر دے تنازعے دے پرامن حل کیتے بامعنی کوششاں کرے۔