پاکستان ’’جائیکا‘‘ دے نال 7 دہائیاں تے محیط شراکت داری کوں انتہائی قدر دی نگاہ نال ݙیکھدے، وزیراعظم شہباز شریف دی جاپانی وفد نال ملاقات اچ ڳالھ مہاڑ

اسلام آباد۔ 5 اگست (اے پی پی) وزیراعظم محمد شہباز شریف آکھیا جو پاکستان جاپان تے ’’جائیکا‘‘ دے نال 7 دہائیاں تے محیط دیرینہ شراکت داری کوں انتہائی قدر دی نگاہ نال ݙیکھدے، مشکل معاشی چیلنجاں تے قابو پا گھدے، ہݨ پائیدار معاشی ترقی کیتے اصلاحات دا عمل تیزی نال جاری اے، صرف ترائے سالاں اچ سرکاری محصولات ݙوڳݨے تھی ڳئن۔ اے ڳالھیں انہاں جاپان انٹرنیشنل کوآپریشن ایجنسی (جائیکا) دے صدر ڈاکٹر تاناکا آکی ہیکو دی سربراہی اچ 9 رکنی وفد نال ڳالھ مہاڑ کریندیں ہوئیں کیتا جئیں بدھ کوں اتھاں انھاں نال ملاقات کیتی۔ وزیراعظم آفس دے میڈیا ونگ توں جاری بیان دے مطابق ملاقات اچ وفاقی وزراء احسن اقبال، احد خان چیمہ، ڈاکٹر مصدق مسعود ملک، حنیف عباسی، سردار اویس احمد خان لغاری، شزا فاطمہ خواجہ، معاونینِ خصوصی سید طارق فاطمی، ہارون اختر تے متعلقہ اداریاں دے اعلیٰ افسر وی موجود ہن۔ وزیراعظم آکھیا جو پاکستان جاپان تے جائیکا دے نال ست دہائیاں تے محیط دیرینہ شراکت داری کوں انتہائی قدر دی نگاہ نال ݙیکھدے۔ انھاں ایں امید دا اظہار کیتا جو ’’جائیکا‘‘ دے صدر دا دورہِ پاکستان ݙوہائیں ممالک دے تعلقات کوں ٻیا مضبوط کریسی۔ وزیراعظم آکھیا جو مشکل معاشی چیلنجاں تے ٹیم ورک نال قابو پاتے، ہݨ پائیدار معاشی ترقی کیتے اصلاحات دا عمل تیزی نال جاری اے، حکومتی اصلاحات دے نتیجے اچ صرف ترائے سالاں اچ سرکاری محصولات ݙوڳݨے تھی ڳئن۔ وزیراعظم آکھیا جو نوجواناں کوں ہنر، تکنیکی تربیت تے باعزت روزگار دے مواقع فراہم کرݨ اتے تریمتیں کوں بااختیار بݨاوݨا حکومت دی اولین ترجیح اے، معدنیات دے شعبے دی ترقی اساݙی ترجیحات اچ شامل اے تے ایں سلسلے اچ ’’جائیکا‘‘ دے تکنیکی تعاون دا خیرمقدم کریسوں۔ انھاں آکھیا جو چھوٹے تے درمیانے درجے دے کاروبار دی ترقی تے فروغ کیتے سمیڈا اچ اصلاحات کر تے ایں کوں ہک فعال تے موثر ادارہ بݨایا، ’’جائیکا‘‘ دا ’’سمیڈا‘‘ دے نال تعاون چھوٹے تے درمیانے درجے دے کاروبار دے فروغ تے برآمدات اچ اضافے کیتے مفید ثابت تھیسی۔وزیراعظم ’’جائیکا‘‘ دے صدر توں جاپان اچ اڄوکے زلزلے اچ قیمتی انسانی جاناں دے نقصان تے افسوس دا اظہار کیتا۔ ڈاکٹر تاناکا آکی ہیکو جاپان اچ زلزلے نال قیمتی جاناں دے نقصان تے ݙکھ تے افسوس دا اظہار کرݨ تے وزیراعظم دا شکریہ ادا کیتا۔ انھاں پاکستان اچ شاندار مہمان نوازی تے وی اظہارِ تشکر کیتا۔انھاں آکھیا جو ’’جائیکا‘‘ تے پاکستان دی شراکت داری تے تعاون دی ہک طویل تاریخ اے، ’’جائیکا‘‘ صحت، تعلیم، شہری و دیہی ترقی، فنی و تکنیکی تربیت تے صنعتی ترقی سمیت مختلف شعبیاں اچ پاکستان توں تعاون کوں مزید وسعت ݙیوݨ کیتے تیار اے۔