بجلی دی تقسیم کار کمپنیاں دی نجکاری دے سارے مرحلے مقررہ مدت اچ مکمل کیتے ونڄن، وزیراعظم شہباز شریف دی جائزہ اجلاس اچ ہدایت

اسلام آباد۔ 5 اگست (اے پی پی) وزیراعظم محمد شہباز شریف “ڈسکوز” دی نجکاری اچ عالمی معیار دے سرمایہ کاراں دی شمولیت یقینی بݨاوݨ کیتے موثر تے جامع حکمتِ عملی اختیار کرݨ دی ہدایت کریندیں آکھیا جو نجکاری دے سارے مرحلے مقررہ مدت اچ طے شدہ قواعد تے بہترین حکمتِ عملی مطابق منافع بخش انداز اچ مکمل کیتے ونڄن۔وزیراعظم محمد شہباز شریف دی زیرِ صدارت بجلی دی تقسیم کار کمپنیاں دی نجکاری تے پرائیویٹائزیشن کمیشن دی اصلاحاتی تنظیمِ نو تے جائزہ اجلاس تھیا۔ اجلاس اچ وفاقی وزیرتوانائی سردار اویس احمد خان لغاری، وفاقی وزیراقتصادی امور احد خان چیمہ، وفاقی وزیر انفارمیشن ٹیکنالوجی شزا فاطمہ خواجہ، وزیراعظم دے مشیرنجکاری محمد علی تے متعلقہ سرکاری اداریں دے عہدیداراں شرکت کیتی۔وزیراعظم دفتر دے میڈیا ونگ توں جاری بیان موجب اجلاس نال خطاب کریندیں وزیراعظم ہدایت کیتی جو بجلی دی تقسیم کار کمپنیاں (ڈسکوز) دی نجکاری اچ عالمی معیار دے سرمایہ کاراں دی شمولیت یقینی بݨاوݨ کیتے موثر تے جامع حکمتِ عملی اختیار کیتی ونڄے، نجکاری کمیشن اچ جاری ادارہ جاتی اصلاحات تے تنظیمِ نو دا کم ہک مہینے اچ مکمل کیتا ونڄے۔وزیراعظم نجکاری دے عمل اچ سرمایہ کاراں دی شمولیت کیتے اندرلے تے ٻاہرلے ملک کیتے ونڄݨ آلے کامیاب روڈ شوز تے اطمینان دا اظہار کریندیں آکھیا جو ڈسکوز دی نجکاری دے سارے مرحلے مقررہ مدت اچ طے شدہ قواعد تے بہترین حکمتِ عملی دے مطابق منافع بخش انداز اچ مکمل کیتے ونڄن۔وزیرِاعظم نجکاری کمیشن دی افرادی قوت اچ عالمی معیار دے مالیاتی، قانونی تے انفارمیشن ٹیکنالوجی دے ماہرین شامل کرݨ دی ہدایت کریندیں آکھیا جو عالمی معیار دی افرادی قوت تے ماہرین نجکاری کمیشن دی استعدادِ کار تے اداریں اچ سرمایہ کاری ودھاوݨ کیتے موثر اقدامات کوں یقینی بݨیسن۔ انھاں نجکاری دے مرحلیں اچ بہترین پیشہ ورانہ استعداد دے حامل کنسلٹنٹ دیاں تجویزاں تے نجکاری دے مرحلیں دی سہولت کیتے درکار سارے قانونی انتظامات تے مالیاتی ریگولیشن فریم ورک دی وقتی تکمیل یقینی بݨاوݨ دی ہدایت وی کیتی۔وزیراعظم آکھیا جو نجکاری دے عمل اچ صارفین دے مفاد کوں ترجیح ݙتی ونڄے، نجکاری اچ شامل اداریں اچ مستقبل اچ صارفین دی شکایتاں دے ازالے دا جامع تے موثر انتظامی ڈھانچہ یقینی بݨایا ونڄے۔وزیراعظم کوں بریفنگ اچ ݙسایا ڳیا جو نجکاری دے پہلے مرحلے اچ شامل بجلی دی تقسیم کار کمپنیاں آئیسکو، فیسکو تے گیپکو اچ سرمایہ کاراں دی دلچسپی کیتے اندرلے تے ٻاہرلے ملک روڈ شوز مکمل کر ڳھدے ڳئن، ترکیہ، سعودی عرب تے چین اچ روڈ شوز تے سرمایہ کاراں توں نجکاری دے تناظر اچ رابطے دے حوصلہ افزا نتیجے سامݨے آندے پئن۔ اجلاس اچ نجکاری کمیشن دی طرفوں تقسیم کار کمپنیاں دے پہلے مرحلے دی تکمیل کیتے ہݨ تئیں کیتے ڳئے اقدامات تے بریفنگ ݙتی ڳئی۔ ایں توں انڄ نجکاری کمیشن دی ادارہ جاتی تنظیمِ نو دے تناظر اچ بہترین افرادی قوت دی شمولیت تے پیشرفت تے وی بریفنگ ݙتی ڳئی۔