وزیراعظم شہباز شریف دا حقِ خودارادیت کیتے کشمیری عوام دی جائز جدوجہد دی غیر متزلزل حمایت دا اعادہ

اسلام آباد۔ 5 اگست (اے پی پی) وزیراعظم محمد شہباز شریف کشمیری عوام دی اپݨے حقِ خودارادیت کیتے جائز جدوجہد کیتے غیر متزلزل حمایت دا اعادہ کریندیں آکھیا جو بھارت اپݨے غیر قانونی زیرِ تسلط جموں و کشمیر اچ وݙے عرصے توں اپݨے غیر قانونی قبضے تے سخت گیر قوانین دے ذریعے آبادی دا تناسب تبدیل کرݨ دی پالیسی تے عمل کریندا پئے۔یومِ استحصالِ کشمیر دی مناسبت نال ایکس تے اپݨے پیغام اچ وزیرِاعظم آکھیا جو بھارت دے غیر قانونی زیرِ تسلط جموں و کشمیر اچ 5 اگست 2019ء دے یکطرفہ تے غیر قانونی اقدامات کوں ست سال مکمل تھیوݨ تے اے حقیقت اپݨی جاہ برقرار اے جو کوئی وی بیان بازی یا پروپیگنڈا جموں و کشمیر دی بین الاقوامی سطح تے منی ڳئی متنازعہ حیثیت کوں بدال نی سڳدا تے نہ ہی اتھاں دے عوام دے انھاں حقوق توں انکار کیتا ونڄ سڳدے جیڑھا بین الاقوامی قانون تے اقوامِ متحدہ دی سلامتی کونسل دیاں متعلقہ قرارداداں اچ تسلیم شدہ ہن۔انھاں آکھیا جو بھارت دے غیر قانونی زیرِ تسلط جموں و کشمیر دی موجودہ صورتحال اے ہے جو طویل عرصے توں جاری باری فوجی موجودگی تے سخت گیر قوانین دے ذریعے بھارت آبادی دا تناسب بدالݨ دی پالیسی تے عمل پیرا اے جیں دا مقصد ایں خطے دی مسلم اکثریتی شناخت کوں بدلݨا اے۔ ایں دے نال نال کشمیری عوام دی آواز دٻاوݨ تے انھاں دی قومی و ثقافتی شناخت مٹاوݨ دیاں منظم کوششاں وی جاری ہن۔انھاں آکھیا جو ترقی دے کھوکھلے تے بے بنیاد دعوے جموں و کشمیر دے عوام دے ایں ناقابلِ تنسیخ حق دا متبادل نی تھی سڳدے جیڑھے او اقوامِ متحدہ دے مینڈیٹ موجب آزادانہ تے غیر جانبدارانہ استصوابِ رائے دے ذریعے اپݨے مستقبل دا خود فیصلہ کرن۔وزیراعظم آکھیا جو پاکستان کشمیری عوام دی جائز جدوجہد کیتے اپݨی غیر متزلزل حمایت دا اعادہ کریندے تے بھارت توں مطالبہ کریندے جو او اپݨے غیر قانونی اقدامات واپس گھنے، انسانی حقوق دیاں خلاف ورزیاں بند کرے تے اقوامِ متحدہ دے منشور، سلامتی کونسل دیاں متعلقہ قرارداداں تے کشمیری عوام دیاں امنگاں موجب جموں و کشمیر جھیڑے دے پرامن حل کیتے سازگار ماحول پیدا کرے۔