وفاقی وزیر بورڈ آف انویسٹمنٹ قیصر احمد شیخ دی ایرانی کاروباری وفد نال ملاقات، تجارت تے سرمایہ کاری ودھاوݨ تے ڳالھ مہاڑ

اسلام آباد۔ 5 اگست (اے پی پی) وفاقی وزیربورڈ آف انویسٹمنٹ قیصر احمد شیخ ایرانی سفارتخانے دے حکام دے رلے آئے ہک اعلیٰ سطحی ایرانی کاروباری وفد نال تفصیلی ملاقات کیتی۔ ملاقات اچ پاکستان تے ایران وچال ݙوطرفہ تجارت، مشترکہ سرمایہ کاری تے اقتصادی تعاون دے ودھارے دے امکانات تے ڳالھ مہاڑ کیتی ڳئی۔ایرانی وفد اچ ٹریڈ فیسلی ٹیشن اینڈ ڈویلپمنٹ دے چیئرمین محمد رضا چفراللہی، شاہروز شریعت جݙاں جو کرمان تے تہران چیمبرز آف کامرس دے اراکین شامل ہن۔ ایں موقع تے بورڈ آف انویسٹمنٹ دے سینئر افسران، بشمول ڈائریکٹر جنرل محمود طفیل وی موجود ہن۔وفاقی وزیر وفد دا خیرمقدم کریندیں آکھیا جو پاکستان تے ایران بھرا اسلامی ملک ہن جنھاں دے درمیان تاریخی، ثقافتی تے مذہبی تعلقات ٻہوں تکڑے ہن۔ انھاں آکھیا جو پاکستان دی 25 کروڑ توں ودھ آبادی ہک وݙی منڈی اے جیڑھی تجارت تے سرمایہ کاری دے وسیع موقع ݙیندی اے۔ایرانی وفد صوبہِ کرمان دی اہمیت تے روشنی سٹیندیں ݙسایا جو اتھاں چار اقتصادی زونز قائم ہن جݙاں جو کرمان چیمبر آف کامرس دے ݙو ہزار توں ودھ ارکان ہن۔ انھاں ݙسایا جو کرمان معدنیات دے شعبے اچ سرِفہرست اے، زرعی پیداوار اچ نمایاں حصہ رکھیندے تے پستہ تے کھجور دی پیداوار دے حوالے نال عالمی شہرت رکھیندے۔ملاقات دے دوران ایرانی وفد کراچی، رمدان، بم تے ممکنہ طور تے چاہ بہار تئیں تجارتی راہداری دے قیام دی تجویز پیش کیتی، ایں مقصد کیتے مشترکہ سرمایہ کاری دے تحت منصوبہ شروع کرݨ تے اتفاقِ رائے پاتا ڳیا جیڑھا ݙوہیں ملکاں وچال تجارتی رابطے کوں مزید تکڑا بݨاوݨ اچ اہم کردار ادا کریسی۔وفد ایں امر تے وی روشنی سٹی جو پاکستان دی ایران کوں برآمدات اچ اڄوکے عرصے اچ تاریخی ودھارا تھئے۔ انھاں ݙسایا جو پاکستانی کاروباری لوک پہلے ہی کرمان دا دورہ کر چکئن جتھاں ہک ہزار توں ودھ کاروباری ملاقاتاں تھی چکئن جیں نال مستقبل دے تعاون دی بنیاد رکھی ونڄ چکی اے۔شاہروز شریعت چاول دی تجارت دے حوالے نال ݙسایا جو ایران کوں سالانہ تقریباً 30 لکھ ٹن چاول درکار ہوندے جیں اچوں 20 لکھ ٹن مقامی طور تے پیدا تھیندے جݙاں جو 10 لکھ ٹن درآمد کیتا ویندے۔ انھاں آکھیا جو پاکستان دا حصہ ودھ تے تقریباً 40 فیصد تھی چکے تے ایں اچ مزید وادھے دے وسیع امکانات موجود ہن۔وفاقی وزیرسانجھے منصوبیں دی اہمیت تے زور ݙیندیں آکھیا جو چاول دی پراسیسنگ، پیٹروکیمیکل، سٹیل، انجینئرنگ سروسز تے آٹو پارٹس دے شعبیں اچ وسیع موقع موجود ہن۔ انھاں ملائیشیا دے نال چاول دی پراسیسنگ اچ مشترکہ منصوبے دی مثال ݙیندیں ایران دے نال وی ایں نوعیت دے تعاون دی حوصلہ افزائی کیتی۔