وزیراعظم نال ایرانی وزیرِ صنعت، کان کنی و تجارت سید محمد اتابک دی سربراہی اچ وفد دی ملاقات

اسلام آباد۔ 5 اگست(اے پی پی)پاکستان اتے ایران سرحدی تجارت دے ودھارے تے 24 گھنٹے بارڈر کھلا رکھݨ کیتے سہولتاں ودھاوݨ، بہتر لاجسٹکس، کسٹمز طریقہِ کار اچ ہم آہنگی گھن آوݨ، کان کنی دے شعبے بالخصوص قیمتی پتھراں دی پراسیسنگ اتے ویلیو ایڈیشن اچ تعاون ودھاوݨ تے اتفاق کیتے، وزیراعظم محمد شہباز شریف آکھیے جو پاکستان خطے اچ امن کیتے اپݨیاں مخلصانہ کوششاں جاری رکھسی۔ وزیراعظم محمد شہباز شریف نال اسلامی جمہوریہ ایران دے وزیرِ صنعت، کان کنی و تجارت سید محمد اتابک دی سربراہی اچ 6 رکنی وفد ملیے۔ ملاقات اچ وفاقی وزراء رانا تنویر حسین، جام کمال خان، علی پرویز ملک، جنید انوار چوہدری، وزیرِ مملکت برائے خزانہ بلال اظہر کیانی، معاونینِ خصوصی سید طارق فاطمی، ہارون اختر اتے طلحہ برکی اتے متعلقہ اداریاں دے اعلیٰ افسراں موجود ہن۔ وزیراعظم آکھیا جو پاکستان اپݨے بہترین ہمسایہ برادر ملک اسلامی جمہوریہ ایران نال تعلقات کوں ݙاݙھی قدر نال ݙیہدے، پاکستان خطے اچ امن کیتے اپݨیاں مخلصانہ کوششاں جاری رکھسی۔ وزیراعظم آکھیا جو خطے اچ پائیدار امن دے قیام اتے پاکستان ایران دے ݙوطرفہ تعلقات بالخصوص تجارت ٻئی ودھاوݨ سانڳے ایرانی صدر ڈاکٹر مسعود پزشکیان نال چنڳی ڳالھ مہاڑ تھئی اے، امید اے جو مسلسل کوششاں نال ݙوہائیں ملکاں دی قیادت ولوں مقرر کردہ 10 ارب ڈالر دی ݙوطرفہ تجارت دا ہدف پورا کیتا ویسی، تجارت بالخصوص خوراک اتے زرعی اجناس و مصنوعات دی تجارت ودھݨ نال ݙوہائیں ملکاں کوں فیدہ تھیسی۔ ملاقات اچ پاکستان اتے ایران وچال سرحدی تجارت ودھاوݨ اتے 24 گھنٹے بارڈر کھلا رکھݨ کیتے سہولتاں ودھاوݨ، بہتر لاجسٹکس اتے کسٹمز طریقہِ کار اچ ہم آہنگی گھن آوݨ سودھا ݙوہائیں ملکاں وچال کان کنی دے شعبے خصوصاً قیمتی پتھراں دی پراسیسنگ اتے ویلیو ایڈیشن اچ وی تعاون ودھاوݨ تے اتفاق کیتا ڳئے۔ ملاقات اچ وزیراعظم شہباز شریف ایران دے سپریم لیڈر آیت اللہ سید مجتبیٰ حسینی خامنہ ای اتے صدر ڈاکٹر مسعود پزشکیان کیتے نیک تمنائواں پچائن۔ ایرانی وزیر سید محمد اتابک آکھیا جو خطے اچ امن کیتے پاکستان دی مخلصانہ سفارتی کوششاں اتے ایران نال یکجہتی تے پاکستانی قیادت اتے عوام کوں خراجِ تحسین پیش کریندے ہیں، پاکستان نال آزاد تجارتی معاہدے دے حوالے نال تکنیکی سطح تے مذاکرات جاری ہن۔