وزیراعظم 6 توں 8 اگست تئیں سعودی عرب دا سرکاری دورہ کریسن، دفترِ خارجہ

اسلام آباد۔ 6 اگست (اے پی پی) وزیراعظم محمد شہباز شریف 6 توں 8 اگست تئیں سعودی عرب دا سرکاری دورہ کریسن۔ خمیس کوں دفترِ خارجہ دے ترجمان دے جاری بیان دے مطابق ایں موقع تے وزیراعظم دے نال ہک اعلیٰ سطح دا وفد وی ہوسی جئیں اچ نائب وزیراعظم تے وزیرِ خارجہ سینیٹر محمد اسحاق ڈار، چیف آف آرمی سٹاف و چیف آف ڈیفنس فورسز سید عاصم منیر اتے وفاقی وزرا شامل ہوسن۔ نائب وزیراعظم تے وزیرِ خارجہ سینیٹر محمد اسحاق ڈار اردن اچ مقبوضہ بیت المقدس بارے وزارتی اجلاس اچ شرکت دے بعد مدینہ المنورہ اچ مختصر قیام دے بعد وفد اچ شامل تھیسن۔ دورے دے دوران وزیراعظم دی سعودی عرب دے ولی عہد تے وزیراعظم شہزادہ محمد بن سلمان بن عبدالعزیز آل سعود نال ملاقات تھیسی جئیں اچ پاکستان تے سعودی عرب دے ݙوپاسہ تعلقات کوں ٻیا مستحکم بݨاوݨ دے نال نال آپسی دلچسپی دے علاقائی تے بین الاقوامی معاملیاں تے ڳالھ مہاڑ تھیسی۔ بیان دے مطابق اے دورہ سعودی عرب دے نال پاکستان دی ایں دیرینہ شراکت داری دا مظہر اے جو کئی ݙھاکیاں تے محیط آپسی اعتماد، تعاون تے برادرانہ تعلقات تے استوار اے۔ بیان اچ آکھیا ڳیا جو اگرچہ اے دورہ خلیج دے خطے اچ ودھدی ہوئی کشیدگی دے پس منظر اچ تھیندا پئے تاہم ایں دی اہمیت فوری بحراناں تے قلیل مدتی حالات توں کہیں ودھ تے اے، اے دورہ ݙوہائیں ملکاں دے ݙوپاسہ تعلقات کوں ٻیا مضبوط بݨاوݨ، سٹریٹجک تعاون کوں فروغ ݙیوݨ، آپسی دلچسپی دے علاقائی تے بین الاقوامی امور تے قریبی رابطے کوں وسعت ݙیوݨ تے کثیرالجہتی تعاون کوں ٻیا مستحکم کرݨ اچ اہم کردار ادا کریسی۔