آبنائے ہرمز دے معاملے تے پیشرفت وسیع تر علاقائی کشیدگی مکاوݨ سانڳے سازگار ماحول پیدا کریسی، ترجمان دفترِ خارجہ طاہر حسین اندرابی دی پریس بریفنگ

اسلام آباد۔ 6 اگست (اے پی پی) پاکستان آکھیے جو آبنائے ہرمز اچ جاری تعطل دا خاتمہ خلیج تے مشرقِ وسطیٰ بالخصوص ایران تے امریکہ وچال وسیع ترجھیڑے دے حل کیتے ٻہوں اہم اے، پاکستان دی طرفوں علاقائی بحران دے جامع، منصفانہ تے پائیدار حل کیتے کیتیاں ونڄݨ آلیاں ساریاں مخلصانہ سفارتی کوششاں دی حمایت جاری رکھی ویسے۔اے ڳالھ دفترِ خارجہ دے ترجمان طاہر حسین اندرابی اتھاں پریس بریفنگ اچ آکھی اے۔ انھاں آکھیا جو پاکستان کشیدگی اچ کمی تے مذاکرات کیتے بھرا ملکاں دے نال سرگرم سفارتی رابطے جاری رکھیا ہویا اے۔ انھاں آکھیا جو آبنائے ہرمز دے معاملے اچ پیش رفت وسیع ترعلاقائی کشیدگی مکاݨ سانڳے سازگار ماحول پیدا کریسی جیں توں ایران تے امریکہ وچال ول مذاکرات دا رستہ وی ہموار تھیسی۔ انھاں آکھیا جو پاکستان سفارتی رابطیں کوں مزید فعال انداز اچ جاری رکھیسی تے بحران دے حل کیتے سارے مخلصانہ اقدامات دی حمایت کریسی کیوں جو خطے اچ پائیدار امن تے استحکام دا واحد قابلِ عمل رستہ سفارت کاری ہی اے۔ترجمان آکھیا جو عمان ہمیشہ خطے اچ امن تے استحکام دے ودھارے کیتے تعمیری کردار ادا کیتے، پاکستان عمان دی خدمات تے کشیدگی اچ کمی تے پرامن بقائے باہمی دے ودھارے کیتے ایں دیاں مستقل کوششاں کوں تسلیم کریندے تے انھاں کوں قدر دی نگاہ نال ݙیہدے۔ہک سوال دے جواب اچ ترجمان آکھیا جو آبنائے ہرمز اچ جاری تعطل خلیج دے بحران دے پائیدار حل دیاں کوششاں کوں مزید اوکھا بݨا ݙتے۔ انھاں آکھیا جو آبنائے ہرمز دے معاملے تے کہیں وی بامعنی پیش رفت توں فریقین کیتے اسلام آباد مفاہمتی یادداشت تے پاکستان-قطر مشترکہ اعلامیے اچ تصور کیتے ڳئے مذاکراتی فریم ورک دی طرفوں واپسی کیتے سازگار ماحول پیدا تھیسی۔ انھاں آکھیا جو اساکوں امید اے جو آبنائے ہرمز متعلق کہیں معاہدے توں مسلسل مذاکرات دا رستہ ہموار تھیسی بالخصوص ایران تے امریکہ دے درمیان تکنیکی مذاکرات دی بحالی ممکن تھی سڳسی۔ترجمان آکھیا جو گزریل ہفتے دے دوران پاکستان دیاں سفارتی سرگرمیاں علاقائی استحکام تے مذاکرات دے ودھارے کیتے ایں دے عزم کوں ظاہر کریندن۔ انھاں آکھیا جو نائب وزیراعظم سینیٹر محمد اسحاق ڈار 30 جولائی کوں سعودی وزیرِ خارجہ شہزادہ فیصل بن فرحان نال ٹیلی فون تے ڳالھ کیتی جیں اچ ݙوہیں رہنماواں بحیرہِ احمر، باب المندب تے فلسطین سودھے علاقائی صورتحال تے ڳالھ مہاڑ کیتی۔ انھاں آکھیا جو 3 اگست کوں نائب وزیراعظم ایرانی وزیرِ خارجہ سید عباس عراقچی نال وی ٹیلی فون تے ڳالھ کیتی ،ݙوہیں رہنماواں مقبوضہ مشرقی بیت المقدس دی وڳڑدی صورتحال سودھے علاقائی تے بین الاقوامی صورتحال تے ڳالھ کیتی جݙاں جو پاکستان ایرانی وزیرِ خارجہ کوں اسلام آباد دے سرکاری دورے دی دعوت وی ݙتی۔طاہر حسین اندرابی آکھیا جو وزیراعظم محمد شہباز شریف 6 توں 8 اگست تئیں سعودی عرب دے سرکاری دورے تے ہن جتھاں انھاں دے رلے نائب وزیراعظم و وزیرِ خارجہ سینیٹر محمد اسحاق ڈار، چیف آف آرمی سٹاف و چیف آف ڈیفنس فورسز تے ٻئے وفاقی وزراء تے مشتمل اعلیٰ سطح دا وفد وی ہے۔ انھاں آکھیا جو دورے دے دوران وزیراعظم سعودی ولی عہد تے وزیراعظم شہزادہ محمد بن سلمان بن عبدالعزیز آل سعود نال ملاقات کریسن جیں اچ ݙوطرفہ تعلقات کوں مزید تکڑا بݨاوݨ دے طریقیں تے علاقائی و عالمی پیش رفت تے ڳالھ کیتی ویسے۔ترجمان آکھیا اگرچہ اے دورہ خلیج دے خطے اچ ودھدی کشیدگی دے پسِ منظر اچ تھیندا پئے تاں جو ایں دی اہمیت فوری بحران توں کتھائیں زیادہ اے، دورے توں ݙوطرفہ تعلقات مزید مستحکم تھیسن، تزویراتی تعاون کوں وسعت ملسی، علاقائی و بین الاقوامی امور تے ہم آہنگی ودھسی تے کثیرالجہتی تعاون کوں ودھارا ملسی۔انھاں نائب وزیراعظم دی 5 اگست کوں عمان اچ منعقدہ مقبوضہ بیت المقدس دے متعلق وزارتی اجلاس اچ شرکت دا وی ذکر کیتا جتھاں پاکستان فلسطینی عوام کیتے اپݨی غیر متزلزل حمایت دا اعادہ کریندیں ہوئیں 1967ء توں پہلے دیاں سرحداں تے مشتمل آزاد، خودمختار تے جغرافیائی طور تے متصل فلسطینی ریاست دے قیام دی حمایت دا اعادہ کیتا جیں دا دارالحکومت القدس الشریف ہووے۔ انھاں آکھیا جو کانفرنس دے موقع تے مصر، پاکستان، سعودی عرب تے ترکیہ دے وزرائے خارجہ وی ملاقات کیتی تے فلسطینی عوام دے ناقابلِ تنسیخ حقوق کیتے اپݨی غیر متزلزل حمایت دا اعادہ کریندیں علاقائی امن، سلامتی، استحکام تے کشیدگی اچ کمی دے ودھارے کیتے مسلسل مشاورت تے سفارت کاری دی اہمیت تے زور ݙتا۔باب المندب توں گزرݨ آلے تجارتی جہازاں تے حملیں متعلق ہک سوال دے جواب اچ ترجمان آکھیا جو پاکستان ہمیشہ انھاں حملیں دی مذمت کیتی اے۔افغانستان متعلق سوال تے ترجمان آکھیا جو پاکستان افغان حکام کوں کئی واری  اپݨی سنگین تشویش دا ݙسا چکیے جیڑھے دہشت گرد گروہ افغان سرزمین استعمال کریندیں ہوئیں پاکستان دے اندر حملے کریندے پئن۔ انھاں آکھیا جو پاکستان مسلسل افغان حکومت تے زور ݙیندا رہ ڳئے جو او ایں ڳالھ کوں یقینی بݨاوے جو ایں دی سرزمین کہیں وی ٻئے ملک دے خلاف دہشت گردی کیتے استعمال نہ تھیوے۔جموں و کشمیر متعلق ہک سوال تے ترجمان آزاد جموں و کشمیر دی قانون ساز اسمبلی دے جاری انتخابات تے بھارت دے بیانات کوں بے بنیاد تے سیاسی محرکات تے مبنی قرار ݙیندیں مسترد کر ݙتا۔ انھاں آکھیا جو انتخابات آزاد جموں و کشمیر دے آئینی تے قانونی فریم ورک موجب پرامن، شفاف تے منظم انداز اچ منعقد تھیندے پئن۔ انھاں پاکستان دے ایں موقف دا اعادہ کیتا جو جموں و کشمیر ہک بین الاقوامی سطح تے تسلیم شدہ متنازعہ علاقہ اے جیں دا حتمی فیصلہ اقوامِ متحدہ دی سلامتی کونسل دیاں متعلقہ قرارداداں تے کشمیری عوام دیاں خواہشات موجب ہووݨا چاہیدے۔بنگلہ دیش متعلق سوال تے ترجمان آکھیا جو پاکستان تے ڈھاکہ وچال سفارتی رابطے معمول دے سفارتی ذرائع توں جاری ہن تے کہیں ہک واقعے تئیں محدود کائنی ۔ انھاں آکھیا جو پاکستان ٻئے ملکاں دے اندرلے معاملیں اچ مداخلت نی کریندا، ایں کیتے بنگلہ دیش دی اڄوکی صورتحال تے ایں دا کوئی تبصرہ کائنی۔ بھارت دے ہک بیان دا حوالہ ݙیندیں انھاں آکھیا جو اے معاملہ نئی دہلی تے ڈھاکہ وچال اے جݙاں جو بنگلہ دیش دے عوام اپݨے مسئلے ٻاہرلی مداخلت دے بغیر خود حل کرݨ دی مکمل صلاحیت رکھیندن۔ انھاں آکھیا جو پاکستان بنگلہ دیش دے خودمختار فیصلیں دا احترام کریندے تے سانجھی ترقی و خوشحالی کیتے ایں دے نال تعاون جاری رکھیسی