امتحانات 2026ء اچ چنڳی کامیابی گھنݨ آلے طلبہ قوم دا قیمتی سرمایہ ہن، بیرسٹر دانیال چوہدری

راولپنڈی۔ 6 اگست (اے پی پی) وفاقی پارلیمانی سیکرٹری اطلاعات و نشریات بیرسٹر دانیال چوہدری آکھیا جو میٹرک سالانہ امتحان 2026ء اچ چنڳی کامیابی حاصل کرݨ آلے طلبہ قوم دا قیمتی سرمایہ تے پاکستان دے روشن مستقبل دی ضمانت ہن۔اے ڳالھ انہاں راولپنڈی بورڈ آف انٹرمیڈیٹ اینڈ سیکنڈری ایجوکیشن دے زیرِ اہتمام فاطمہ جناح ویمن یونیورسٹی اچ میٹرک سالانہ امتحان 2026ء دے پوزیشن ہولڈر طلبہ دے اعزاز اچ منعقدہ تقریبِ تقسیمِ انعامات توں خطاب کریندیں آکھی ۔ ایں موقع تے رکنِ قومی اسمبلی ملک ابرار احمد، رکنِ صوبائی اسمبلی اسماءعباسی، چیئرمین تعلیمی بورڈ راولپنڈی پروفیسر ڈاکٹر اقبال محمود، کنٹرولر امتحانات تنویر اصغر اعوان، اساتذہ کرام، والدین، طلبہ تے مختلف شعبہ ہائے زندگی نال تعلق رکھݨ آلے لوک موجود ہن۔بیرسٹر دانیال چوہدری پوزیشن ہولڈر طالبیں ، انھاں دے والدین تے اساتذہ کرام کوں دلوں مبارخ ݙیندے آکھیا جو اڄ دا ݙینھ محنت، لگن، استقامت تے عزم دے ثمرات سانبھݨ دا ݙینھ اے۔ انھاں آکھیا جو نوجوان نسل پاکستان دا روشن مستقبل اے ایں کیتے انھاں کوں اپݨی صلاحیتاں کوں ملک و قوم دی ترقی، خوشحالی تے استحکام کیتے بروئے کار گھن آوݨا چاہیدے۔وفاقی پارلیمانی سیکرٹری طلبہ تے زور ݙتا جو او کامیابی کوں اپݨی منزل نی بلکہ مزید محنت، مسلسل جدوجہد تے اعلیٰ مقصد دے حصول دا نقطہِ آغاز سمجھن۔ انھاں آکھیا جو تعلیم ہی او طاقت اے جیڑھی قوماں دی تقدیر بدلیندی اے، لہٰذا طلبہ علم دے حصول دے نال اعلیٰ اخلاق، دیانت، نظم و ضبط تے قومی اقدار کوں وی اپݨی زندگی دا حصہ بݨاون۔بیرسٹر دانیال چوہدری والدین، خصوصاً ماواں کوں خراجِ تحسین پیش کریندیں آکھیا جو ٻالاں دی تعلیم، تربیت تے کردار سازی اچ والدہ دا کردار ساریں توں نمایاں ہوندے۔ ماواں دیاں دعاواں، رہنمائی، شفقت تے مسلسل حوصلہ افزائی ٻالاں کوں کامیابی دی منزل تئیں پڄاوݨ اچ کلیدی کردار ادا کریندی اے۔