سکیورٹی فورسز دی بلوچستان اچ مختلف کارروائیاں، فتنہ الہندوستان دے 12 دہشتگرد ہلاک

راولپنڈی۔ 6 اگست(اے پی پی)سکیورٹی فورسز بلوچستان دے اضلاع واشک اتے مستونگ اچ انٹیلی جنس دی بنیاد تے کارروائیاں کریندے ہوئے فتنہ الہندوستان دے 12 دہشتگرد ہلاک کر ݙتن۔ پاک فوج دے شعبہ تعلقات عامہ (آئی ایس پی آر) توں جاری بیان دے مطابق 5 اتے 6 اگست کوں سکیورٹی فورسز بلوچستان دے اضلاع واشک اتے مستونگ اچ انٹیلی جنس دی بنیاد تے ݙو تیز رفتار آپریشنز کیتن۔ اے کارروائیاں ردالفتنہ-3 دے تحت جاری انٹیلی جنس بیسڈ آپریشنز دی مسلسل مہم دا حصہ ہین جیںدا مقصد بھارتی سرپرستی اچ کم کرݨ والے دہشت گرد گروہ فتنہ الہندوستان دا مکمل خاتمہ اے۔ انھاں کامیاب کارروائیاں اچ فتنہ الہندوستان دے 12 دہشت گرد ہلاک کر ݙتے ڳئن۔ 5 اگست کوں سکیورٹی فورسز ضلع واشک اچ 6 دہشت گرداں دی نقل و حرکت دا پتا لائے۔ سکیورٹی فورسز فوری اتے مؤثر انداز اچ دہشت گرداں کوں نشانہ ٻݨایا۔ انتہائی درست اتے پیشہ وارانہ کارروائی اچ بھارتی پراکسی فتنہ الہندوستان دے سارے 6 دہشتگرد جہنم واصل کر ݙتے ڳئے۔ ہک ٻیا انٹیلی جنس بیسڈ آپریشن 6 اگست کوں ضلع مستونگ اچ کیتا ڳیا جتھاں سکیورٹی فورسز اتے دہشت گرداں وچال شدید فائرنگ دے بعد ٻئے 6 دہشتگرد جہنم واصل کر ݙتے ڳئے۔ کارروائی اچ دہشت گرداں دا ٹھکاݨا وی تباہ کر ݙتا ڳیا۔