وفاقی وزیرِ داخلہ دا سیف سٹی ہیڈکوارٹرز دا دورہ، توسیعی منصوبہ 30 ستمبر تئیں مکمل کرݨ دا ٹاسک

اسلام آباد۔ 7 اگست (اے پی پی) وفاقی وزیرِ داخلہ محسن نقوی اسلام آباد سیف سٹی توسیعی منصوبے کوں 30 ستمبر تئیں ہر صورت مکمل کرݨ دی ڈیڈ لائن مقرر کریندیں ہوئیں متعلقہ حکام کوں ‘سیف سٹی بل’ حتمی شکل ݙے تے جلدی توں جلدی قومی اسمبلی اچ پیش کرݨ دی ہدایت کیتی اے۔ وزیرِ داخلہ محسن نقوی تے وزیرِ مملکت طلال چوہدری سیف سٹی ہیڈکوارٹرز دا دورہ کیتا۔ ایں موقع تے وزیرِ داخلہ دی صدارت ہک خصوصی اجلاس تھیا جئیں اچ توسیعی پراجیکٹ تے ہݨ تک تھووݨ آلی پیش رفت دا تفصیلی جائزہ گھدا ڳیا۔ حکام بریفنگ اچ بتایا جو سیف سٹی توسیعی منصوبے تے مجموعی طور تے 85 فیصد کم مکمل تھی ڳئے، ایں دے تحت 85 فیصد نویں کیمرے نصب کیتے ڳئن جڈانجو 415 کلومیٹر طویل آپٹیکل فائبر وچھا ݙتی ڳئی اے، مزید برآں ڈیٹا سینٹر، سائبر آرکیٹیکچر تے سائبر سکیورٹی تے وی 80 فیصد کم مکمل تھی ڳئے۔ وزیرِ داخلہ اسلام آباد سیف سٹی دے جدید ‘فیوژن سینٹر’ کوں وی ترائے مہینیاں دے اندر مکمل کرݨ دا ہدف ݙتا۔ انھاں آکھیا جو اساݙا عزم اسلام آباد سیف سٹی کوں جدید، سمارٹ تے ترقی یافتہ ملکاں دی طرز تے عالمی معیار دا ادارہ بݨاوݨ اے۔ انھاں ایں ڳالھ تے زور ݙتا جو جدید ٹیکنالوجی نال لیس ایہ سیف سٹی نظام شہریاں دے تحفظ، جرائم دی مؤثر نگرانی تے ہنگامی صورتحال اچ فوری رسپانس کوں یقینی بݨیسے۔ اجلاس اچ وفاقی سیکرٹری داخلہ، ڈائریکٹر جنرل فیڈرل انویسٹی گیشن ایجنسی (ڈی جی ایف آئی اے)، سیف سٹی دے اعلیٰ حکام تے ٻئے متعلقہ افسران وی شرکت کیتی۔