سول ایوارڈز کیتے نامزد شخصیتاں دا حتمی جائزہ مکمل، میرٹ اولین ترجیح اے، احسن اقبال

اسلام آباد۔ 7 اگست (اے پی پی) وفاقی وزیر برائے منصوبہ بندی، ترقی، اصلاحات تے خصوصی اقدامات پروفیسر احسن اقبال آکھیا جو پاکستان سول ایوارڈز کمیٹی آئینِ پاکستان تے مقررہ اصولاں دے مطابق سائنس، تعلیم، ادب، فن تے عوامی خدمت دے شعبیاں اچ غیر معمولی خدمات انجام ݙیوݨ آلیاں شخصیتاں دی نامزدگیاں دا حتمی جائزہ گھدے۔ پاکستان سول ایوارڈز کمیٹی دی صدارت کریندیں ہوئیں انھاں آکھیا جو حکومت دی اولین ترجیح خالص میرٹ دی بنیاد تے انھاں قومی ہیروز کوں اعزاز نال نوازݨ اے جنھاں آپݨی صلاحیتاں، محنت تے خدمات دے ذریعے پاکستان دا ناں پوری دنیا اچ روشن کیتا۔ پروفیسر احسن اقبال آکھیا جو جݙݨ قوم آپݨے حقیقی معماراں تے محسناں کوں عزت تے احترام ݙیندی اے تاں ایہو اعتراف آوݨ آلی نسلاں کیتے تحریک، حوصلہ تے ملک دی خدمت دے جذبے کوں فروغ ݙیوݨ دا مؤثر ذریعہ بݨدے۔ انھاں ایں عزم دا اظہار کیتا جو سول ایوارڈز دا عمل مکمل شفافیت، انصاف تے میرٹ دے اصولاں دے مطابق جاری رکھیا ویسے تانجو قومی خدمت انجام ݙیوݨ آلیاں ممتاز شخصیتاں دی خدمات دا بھرپور اعتراف کیتا ونڄ سڳے۔