خیبر پختونخوا اچ ݙو مختلف کارروائیاں دے دوران فتنہ الخوارج نال تعلق رکھݨ آلے ݙاہ خوارج ہلاک، آئی ایس پی آر

راولپنڈی۔ 7 اگست (اے پی پی) سکیورٹی فورسز صوبہ خیبر پختونخوا اچ ݙو مختلف کارروائیاں دے دوران بھارت دے حمایت یافتہ فتنہ الخوارج نال تعلق رکھݨ آلےݙاہ خوارج ہلاک کر ݙتے ہن۔ جمعے کوں پاک فوج دے شعبہ تعلقات عامہ (آئی ایس پی آر) توں جاری بیان دے مطابق پہلی کارروائی اچ بھارتی پراکسی فتنہ الخوارج نال تعلق رکھݨ آلے خوارج دے ہک گروہ ضلع جنوبی وزیرستان دے علاقے اعظم ورسک اچ سکیورٹی فورسز دیاں چیک پوسٹاں تے حملے دی کوشش کیتی، جئیں کوں سکیورٹی فورسز بروقت تے مؤثر کارروائی دے ذریعے ناکام بݨا ݙتا۔ بعد اچ شدید فائرنگ دے تبادلے اچ سکیورٹی فورسز دی درست تے مؤثر جوابی کارروائی دے نتیجے اچ اٹھ خوارج جہنم واصل کر ݙتے ڳئے۔ ݙوجھی کارروائی ضلع دیر اچ کیتی ڳئی، جتھاں سکیورٹی فورسز ٻئے ݙو خوارج کوں ہلاک کر ݙتا۔ ہلاک تھووݨ آلے بھارت دے حمایت یافتہ خوارج دے قبضے توں اسلحہ تے گولہ بارود وی برآمد کیتا ڳیا۔ اے عناصر علاقے اچ متعدد دہشت گرد کارروائیاں اچ سرگرم رہے ہن۔ علاقے اچ موجود کہیں وی ممکنہ خارجی دے خاتمے کیتے کلیئرنس و سینیٹائزیشن آپریشن جاری اے۔ آئی ایس پی آر آکھیا جو سکیورٹی فورسز تے پاکستان دے قانون نافذ کرݨ آلے ادارے نیشنل ایکشن پلان دے منظور شدہ وژن عزمِ استحکام دے تحت ملک توں بیرونی سرپرستی تے حمایت یافتہ دہشت گردی دے مکمل خاتمے تئیں آپݨی بلا امتیاز انسدادِ دہشت گردی مہم پوری قوت دے نال جاری رکھیسن۔