سی پیک دے تحت پاکستان کوں چین توں 258 جدید زرعی مشیناں موصول، مقصد زراعت کوں جدید خطوط تے فروغ ݙیوݨ اے

اسلام آباد۔ 7 اگست (اے پی پی) چین-پاکستان اقتصادی راہداری (سی پیک) دے تحت پاکستان کوں زرعی تعاون دے پروگرام دے تحت چین توں جدید زرعی مشینری تے آبپاشی دے آلات دے 258 یونٹس موصول تھئن جنھاں دا مقصد ملک دے زرعی شعبے دی جدید خطوط تے ترقی کوں فروغ ݙیوݨ اے۔ ویلتھ پاکستان کوں دستیاب سرکاری دستاویزات دے مطابق اے  مشینری پاکستان زرعی تحقیقاتی کونسل (پارک) دے ایگریکلچرل انجینئرنگ انسٹی ٹیوٹ نیشنل ایگریکلچرل ریسرچ سینٹر (نارک) اچ وصول تے اسمبل کیتی، بعد اچ ایں دا باضابطہ افتتاح کیتا ڳیا اتے ایں کوں پارک تے صوبائی حکومتاں اچ تقسیم کیتا ڳیا تانجو پورے ملک اچ جدید زرعی ٹیکنالوجی دے عملی مظاہرے تے فروغ کوں یقینی بݨایا ونڄ سڳے۔ دستاویزات دے مطابق ایں پیکیج اچ نو اقسام دی زرعی مشینری تے آلات شامل ہن جنھاں اچ 40 ٹریکٹر، 20 روٹری ٹلرز، 30 روٹری ٹلج فرٹیلائزر ڈرلز، 40 کرالر ٹائپ رائس-ویٹ کمبائن ہارویسٹرز، آٹھ کارن ہارویسٹرز، 40 انٹر ٹلج ویڈرز، 40 ٹرمرز، 20 ہوز ریل آبپاشی نظام تے 20 شمسی توانائی نال چلݨ آلے واٹر پمپنگ سسٹمز شامل ہن، کل 258 یونٹس وچوں 75 پنجاب، 45 سندھ، 38 خیبرپختونخوا، 36 بلوچستان تے 64 یونٹس پارک کوں فراہم کیتے ڳئن۔ دستاویزات دے مطابق اے معاونت وزیراعظم دے زرعی جدید کاری اقدام دا حصہ اے جئیں دا مقصد پاکستان دی زراعت کوں جدید، ٹیکنالوجی تے مبنی، موسمیاتی تبدیلیاں نال ہم آہنگ اتے برآمدات تے مبنی شعبے اچ تبدیل کرݨ اے۔ ایں پروگرام دے ذریعے زرعی پیداوار ودھاوݨ، غذائی تحفظ یقینی بݨاوݨ، ویلیو ایڈیشن کوں فروغ ݙیوݨ تے زرعی و غذائی نظام دی مسابقتی صلاحیت مضبوط بݨاوݨ تے توجہ ݙتی ویندی پئی اے۔ ایں اقدام کوں حال ای اچ منظور تھیوݨ آلی قومی زرعی بائیوٹیکنالوجی پالیسی 2026ء تے قومی سیڈ پالیسی 2026ء دی وی حمایت حاصل اے جنھاں دے تحت بہتر فصلی اقسام دی تیاری تے تجارتی بنیاد تے فروغ، بائیوٹیکنالوجی تے جینوم تے مبنی تحقیق، قومی بیج نظام دی مضبوطی، نجی سرمایہ کاری دی حوصلہ افزائی، معیاری جانچ، بیجاں دی تصدیق نیز موسمیاتی تبدیلیاں نال ہم آہنگ اتے زیادہ پیداوار ݙیوݨ آلیاں اقسام تک رسائی بہتر بݨاوݨ کیتے رہنما فریم ورک فراہم کیتا ڳئے۔ دستاویزات دے مطابق ایں منصوبے دا اہم حصہ پاکستان زرعی تحقیقاتی کونسل (پارک) تے چائنیز اکیڈمی آف ایگریکلچرل سائنسز (سی اے اے ایس) دے درمیان سٹریٹجک تعاون اے۔ وفاقی حکومت مارچ 2026ء اچ اصولی طور تے پارک کوں سی اے اے ایس دی طرز تے ازسرِنو منظم کرݨ دی منظوری ݙتی تے ایں عمل دی نگرانی کیتے خصوصی ورکنگ گروپ وی قائم کیتا۔ ایں منصوبے دے تحت اسلام آباد اچ واقع نیشنل ایگریکلچرل ریسرچ سینٹر (نارک) اچ پنج سینٹرز آف ایکسی لینس قائم کیتے ویسن جتھاں کھیتی تے باغبانی دیاں فصلاں تے جینوم تحقیق، مویشیاں دی جینیاتی بہتری و صحت، زمین، پانی تے توانائی کیتے کلائمیٹ سمارٹ حل، زرعی و غذائی نظام اچ مصنوعی ذہانت و جدید ٹیکنالوجی، نیز فوڈ پراسیسنگ، ویلیو ایڈیشن تے مصنوعات دی تیاری تے تحقیق کیتی ویسے۔ایں اقدام دا ہک ٻیا اہم حصہ وزیراعظم دا ہک ہزار پاکستانی زرعی گریجویٹس کوں چین اچ تربیت ݙیوݨ دا پروگرام اے، ہݨ تک 885 گریجویٹس خصوصی تربیت مکمل کر ڳھدی اے جڈانجو باقی 115 تربیت یافتہ افراد جلد چین روانہ تھیسن جئیں دے بعد وزیراعظم دا اے وعدہ مکمل تھی ویسے۔ تربیتی پروگرام اچ آبی زراعت، فصلاں دی افزائش تے جینو مکس، زرعی میکانائزیشن، پھلاں تے سبزیاں دی پراسیسنگ، جدید آبپاشی نظام، ڈرونز، مصنوعی ذہانت، آئی او ٹی، مویشیاں دی افزائش و جینومکس، مویشیاں دیاں بیماریاں دی نگرانی تے بیجاں دی پیداوار تے پراسیسنگ سمیت نو ترجیحی شعبے شامل ہن۔ دستاویزات دے مطابق تربیت مکمل کرݨ آلے گریجویٹس ماسٹر ٹرینرز دے طور تے کم کریسن اتے جدید زرعی معلومات تے ٹیکنالوجی کساناں، زرعی توسیعی اداریاں، محققین تے تعلیمی اداریاں تئیں منتقل کریسن۔ ایں پروگرام نال ہائبرڈ بیجاں، پریسیژن ایگریکلچر، زرعی میکانائزیشن، پانی بچاوݨ آلی ٹیکنالوجیز تے ویلیو ایڈڈ پراسیسنگ دے فروغ دے نال نال زرعی پیداوار تے عالمی مسابقت اچ اضافہ متوقع اے۔