ملک محمد عامر ڈوگر نال ملاقات دے دوران پی ٹی آئی کوں حکومت دے نال مذاکرات دی بحالی یا ول مذاکرات شروع کرݨ دی کوئی دعوت یا تجویز کائںی ݙتی، سردار ایاز صادق

اسلام آباد۔ 7 اگست (اے پی پی) سپیکر قومی اسمبلی سردار ایاز صادق واضح کیتے جو انھاں گزریل ݙینھ رکنِ قومی اسمبلی ملک محمد عامر ڈوگر نال ملاقات دے دوران پاکستان تحریکِ انصاف (پی ٹی آئی) کوں حکومت دے نال مذاکرات دی بحالی یا ول مذاکرات شروع کرݨ دی کوئی دعوت یا تجویز کائنی ݙتی، ایں ملاقات اچ وفاقی وزیرپارلیمانی امور ڈاکٹر طارق فضل چوہدری وی موجود ہن، قومی اسمبلی دے آندے اجلاس متعلق امور تے ڳالھ تھئی ، انھاں واضح کیتا جو ملاقات دے دوران حکومتی تے اپوزیشن بنچز وچال مذاکرات دی بحالی یا آغاز دے حوالے نال کوئی ڳالھ مہاڑآ یا تجویز تے غور نی تھیا۔میڈیا نال ڳالھ کریندے سپیکر سردار ایاز صادق آکھیا جو انھاں ݙوہیں توں صرف یومِ آزادی دی تقریب اچ شرکت کرݨ آلے ارکانِ قومی اسمبلی دے ناں منڳئن۔ انھاں واضح کیتا جو ایں دے علاوہ کوئی ٻئی ڳالھ نی تھئی۔سپیکر سردار ایاز صادق مزید آکھیا جے ڈاکٹر طارق فضل چوہدری تے ملک محمد عامر ڈوگر وچال مذاکرات دے حوالے نال کوئی ڳالھ تھئی اے تاں انہاں کوں ایں بارے علم کائنی ۔سپیکر قومی اسمبلی آکھیا جو انھاں ماضی اچ حکومت تے اپوزیشن وچال مذاکرات کیتے کئی واری کوششاں کیتیاں تے مذاکرات دیاں دعوتاں ݙتیاں تاں جو ہݨ انھاں مذاکرات کیتے دعوت ݙیوݨ چھوڑݙتے۔ انھاں آکھیا جو میں مذاکرات دیاں دعوتاں ݙیندے ݙیندے تھک ڳیاں، ہݨ میں مذاکرات کیتے آکھݨ چھوڑ ݙتے۔سپیکر سردار ایاز صادق آکھیا جو وزیراعظم محمد شہباز شریف وی ماضی اچ ٻہوں واری اپوزیشن کوں پارلیمان دے فلور تے مذاکرات دی دعوت ݙتی اے۔ انھاں آکھیا جو ہر مسئلے دا حل بالآخر رل ٻہہ تے تے سانجھا اتفاقِ رائے پیدا کرتے کڈھیا ونڄ سڳدے تاں جو صرف میڈیا اچ بیان ݙیوݨ نال مذاکرات نی تھی سڳدے۔ انھاں آکھیا جو مذاکرات کیتے میز تے ٻہݨ ضروری اے۔سپیکر سردار ایاز صادق آکھیا جو ممکن اے جو پی ٹی آئی قائدِ حزبِ اختلاف دا انتخاب ایں توقع دے نال کیتا ہووے جو او مذاکرات کریسن تاں جو شاید انھاں کوں مذاکرات کیتے اجازت نی ݙتی ڳئی۔پی ٹی آئی متعلق قائمہ کمیٹیاں دے چیئرمین نال منسلک عملے دے حوالے نال سوال دے جواب اچ سپیکر قومی اسمبلی آکھیا متعلقہ قائمہ کمیٹیاں دے چیئرمین اے عملہ واپس کرݙیون تاں ایں کوں واپس گھن ڳھدا ویسے تے قومی اسمبلی ایں عملے کوں اپݨی ضرورت موجب استعمال کریسی۔سپیکر قومی اسمبلی سردار ایاز صادق ہک واری ٻئے قائدِ حزبِ اختلاف نال ملاقات تے آمادگی دا اظہار کریندیں آکھیا جے قائدِ حزبِ اختلاف انھاں دے چیمبر اچ آوݨ نی چاہندے تاں او کمیٹی روم اچ آ سڳدن۔ انھاں آکھیا جو ملاقات کوں سوکھا بݨاوݨ کیتے او خود اپݨا چیمبر خالی کر ݙیسن تاں جو سپیکر سردار ایاز صادق واضح کیتا جو بنیادی سوال اے ہے جو کیا اپوزیشن واقعی مذاکرات کرݨ چاہندی اے یا کائناں۔ انھاں آکھیا جو اصل مسئلہ اے ہے جو او مذاکرات نی کرݨ چاہندے۔سپیکر قومی اسمبلی سردار ایاز صادق ایں ڳالھ دا اعادہ کیتا جوسیاسی مذاکرات تے مسئلیں دے حل کیتے پارلیمان ہی موزوں ترین فورم اے جتھاں سانجھی مشاورت، سنجیدہ مکالمے تے بامعنی رابطے دے ذریعے مسئلیں دا حل لبھیا ونڄ سڳدے۔