مکہ مکرمہ۔ 7 اگست (اے پی پی)پاکستان، سعودی عرب تے ترکیہ وچال مشترکہ دفاعی معاہدہ طے پاڳئے جیں دے تحت ترائی ملکاں وچال دفاعی تعاون دے سارے شعبیں کوں مزید وسعت ݙیندیں تکڑا بݨایا ویسے تے ترائی ملکاں وچوں کہیں ہک دے خلاف کوئی وی مسلح حملہ ترائی ملکاں دے خلاف حملہ تصور کیتا ویسے۔ ایں تاریخی معاہدے تے سعودی عرب دے ولی عہد / وزیراعظم شہزادہ محمد بن سلمان …
پاکستان، سعودی عرب تے ترکیہ وچال مشترکہ دفاعی معاہدہ، ترائی ملکاں وچال دفاعی تعاون دے سارے شعبیں کوں مزید تکڑا بݨایا ویسے، وزیراعظم آفس اعلامیہ
مزید خبراں
مکہ مکرمہ۔ 7 اگست (اے پی پی)پاکستان، سعودی عرب تے ترکیہ وچال مشترکہ دفاعی معاہدہ طے پاڳئے جیں دے تحت ترائی ملکاں وچال دفاعی تعاون دے سارے شعبیں کوں مزید وسعت ݙیندیں تکڑا بݨایا ویسے تے ترائی ملکاں وچوں کہیں ہک دے خلاف کوئی وی مسلح حملہ ترائی ملکاں دے خلاف حملہ تصور کیتا ویسے۔ ایں تاریخی معاہدے تے سعودی عرب دے ولی عہد / وزیراعظم شہزادہ محمد بن سلمان بن عبدالعزیز آلِ سعود، ترکیہ دے صدر رجب طیب اردوان تے وزیراعظم محمد شہباز شریف مکہ مکرمہ اچ تھیوݨ آلے سربراہی اجلاس دے موقع تے دستخط کیتے۔وزیراعظم دفتر دے میڈیا ونگ توں جاری بیان موجب ترائی ملکاں وچال مشترکہ دفاع کیتے مکہ المکرمہ اچ تھیوݨ آلے سربراہی اجلاس کیتے خادم الحرمین الشریفین شاہ سلمان بن عبدالعزیز آلِ سعود دی دعوت تے ترکیہ دے صدر رجب طیب اردوان تے پاکستان دے وزیراعظم محمد شہباز شریف سعودی عرب دا دورہ کیتا۔ ولی عہد و وزیراعظم شہزادہ محمد بن سلمان بن عبدالعزیز آلِ سعود جمہوریہ ترکیہ دے صدر تے پاکستان دے وزیراعظم دا مکہ المکرمہ دے قصر الصفا اچ استقبال کیتا جتھاں مشترکہ دفاع کیتے مکہ المکرمہ سربراہی اجلاس منعقد تھیا۔اجلاس دے دوران مملکتِ سعودی عرب، جمہوریہ ترکیہ تے پاکستان وچال قائم پراݨے تعلقات دا جائزہ ڳھدا ڳیا تے سانجھی دلچسپی دے امور تے ڳالھ مہاڑ کیتی ڳئی۔ ترائی ملکاں وچال پراݨے تاریخی تعلقات، اخوت تے اسلامی یکجہتی دے پائیدار رشتیں، مشترکہ تزویراتی مفادات تے دفاعی شعبے اچ طویل عرصے توں جاری تعاون دی روشنی اچ مملکتِ سعودی عرب دے ولی عہد تے وزیراعظم شہزادہ محمد بن سلمان بن عبدالعزیز آلِ سعود، ترکیہ دے صدر رجب طیب اردوان تے پاکستان دے وزیراعظم محمد شہباز شریف مکہ مشترکہ دفاعی معاہدے تے دستخط کیتے۔بیان موجب اے معاہدہ ترائی ملکاں دی طرفوں اپݨی اجتماعی سلامتی کوں مزید مستحکم کرݨ تے خطے سودھے دنیا بھر اچ امن، سلامتی تے استحکام دے ودھارے دے مشترکہ عزم دی عکاسی کریندے تاں جو ہک محفوظ تے خوشحال مستقبل دے حصول کوں یقینی بݨایا ونڄ سڳے۔ بیان اچ آکھیا ڳئے جو معاہدے دا مقصد کہیں وی جارحیت دے خلاف اجتماعی دفاع کوں تکڑا بݨاوݨ اے۔ معاہدے اچ اے واضح طور تے طے کیتا ڳئے جو ترائی ملکاں وچوں کہیں ہک دے خلاف کوئی وی مسلح حملہ ترائی ملکاں دے خلاف حملہ تصور کیتا ویسے۔ مزید معاہدہ ترائی ملکاں وچال دفاعی تعاون دے سارے شعبیں کوں مزید وسعت ݙیوݨ تے مضبوط بݨاوݨ دی وی ضمانت ݙیندے۔
