صدرِ مملکت دی سنگاپور دی قیادت کوں انھاں دے قومی ݙینھ تے مبارکباد

اسلام آباد۔ 9 اگست (اے پی پی) صدرِ مملکت آصف علی زرداری سنگاپور دے 61 ویں قومی ݙینھ دے موقع تے سنگاپور دے ہم منصب تھرمن شنموگارتنم، سنگاپور دی حکومت تے عوام کوں مبارکباد دا سنیھا ݙتے۔ اتوار دے ݙینھ ایوانِ صدر دے پریس ونگ توں جاری بیان دے مطابق صدرِ مملکت آپݨے خط اچ آکھیا جو پاکستان سنگاپور دی بصیرت افروز قیادت، دانشمندانہ طرزِ حکمرانی تے عوام دے غیر متزلزل عزم دے ذریعے حاصل تھیوݨ آلی تعمیرِ ملت تے معاشی تبدیلی دے شاندار سفر کوں قدر دی نگاہ نال ݙیکھدے۔ انھاں سنگاپور دی کامیابی، جدت طرازی تے پیش رفت کوں ہک متاثر کن مثال قرار ݙتا۔ صدر آصف علی زرداری رواں سال کوں پاکستان تے سنگاپور وچال سفارتی تعلقات دے قیام دی 60 ویں سالگرہ دے طور تے خاص اہمیت دا حامل قرار ݙتا۔ انھاں آکھیا جو گزشتہ چھی ݙہاکیاں دے دوران آپسی اعتماد، خیر سگالی تے عوامی رابطیاں تے مبنی اے دوستی مسلسل پروان چڑھی۔ انھاں دا آکھݨ ہئی جو ݙونھائیں ملک کثیر الجہتی فورمز تے آپݨے رابطے جاری تے ݙو پاسہ سیاسی رابطیاں کوں وی برقرار رکھیسن۔ صدرِ مملکت آکھیا جو ڈیجیٹل معیشت، گرین ٹیکنالوجی، سمندری تے لاجسٹکس رابطیاں، شہری منصوبہ بندی، پیشہ ورانہ تربیت، تعلیمی تے ثقافتی تبادلے تے سیاحت دے شعبیاں اچ توسیع دے وسیع امکانات موجود ہن۔ انھاں آکھیا جو پاکستان ݙونھاں ملکاں تے انھاں دے عوام دے فائدے کیتے آپسی دلچسپی دے شعبیاں اچ تعاون کوں مضبوط بݨانوݨ کیتے سنگاپور دے نال رل تے کام کرݨ دا خواہاں اے۔