مکہ معاہدہ مکمل طور تے دفاعی نوعیت دا حامل اے اتے ایں دا مقصد کہیں وی ملک دے خلاف کارروائی کرݨ نئی، نائب وزیرِ اعظم تے وزیرِ خارجہ سینیٹر محمد اسحاق ڈار

اسلام آباد۔ 9 اگست (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار واضح کیتے جو مکہ معاہدہ مکمل طور تے دفاعی نوعیت دا حامل اے اتے ایں دا مقصد کہیں وی ملک دے خلاف کارروائی کرݨ نہیں، بلکہ خطے اچ امن، استحکام تے خوشحالی کیتے جاری کوششاں کوں مزید مضبوط بݨاوݨ اے، ہر او ملک ایں معاہدے اچ شامل تھی سڳدے جو معاہدے دے بنیادی اصولاں دی پاسداری تے باہمی احترام، تعاون تے پُرامن ذرائع دے ذریعے اختلافات دے حل کیتے آمادہ تھیوے۔ اتوار دے ݙینھ ایکس تے آپݨے سنیھے اچ نائب وزیرِ اعظم تے وزیرِ خارجہ سینیٹر محمد اسحاق ڈار مکہ مشترکہ دفاعی معاہدے (مکہ معاہدہ) دے حوالے نال وضاحت کریندیں ہوئیں آکھیا جو گزشتہ ݙو ݙینھ دے دوران “مکہ مشترکہ دفاعی معاہدے” (مکہ معاہدہ) دے حوالے نال جاری بحث تے عوامی دلچسپی دے تناظر اچ، اوایں معاہدے دے بارے اچ وضاحت کریندے پئن۔ انھاں آکھیا جو مکہ مشترکہ دفاعی معاہدہ جئیں تے پاکستان، سعودی عرب تے ترکیہ 7 اگست 2026ء کوں مکہ مکرمہ اچ مشترکہ طور تے دستخط کیتن، ترائیں ملکاں دی قیادت تے عوام وچال برادرانہ تعلقات دی گہرائی دا عکاس اے۔ انھاں آکھیا جو مکہ معاہدہ کئی سالاں توں جاری مذاکرات تے آپسی رابطہ کاری دا نتیجہ اے، جئیں دا مقصد امن تے سلامتی دے مختلف چیلنجز نال نبڑݨ، سٹریٹجک تعاون کوں مضبوط بݨاوݨ تے خطے اچ امن، استحکام تے خوشحالی دے فروغ کیتے مشترکہ خواہش کوں اڳوں ودھاوݨ اے۔ نائب وزیرِ اعظم آکھیا جو مکہ معاہدہ انھاں ملکاں دے درمیان موجود کہیں وی ݙو طرفہ یا کثیر الجہتی معاہدے، یا ٻئے ملکاں تے تنظیماں دے نال موجود معاہدیاں کوں منسوخ یا تبدیل نئی کریندا اتے نہ ای انھاں دی ڄاہ گھندے۔