ایف بی آر مقررہ ریونیو ہدف دے حصول کیتے انفورسمنٹ اقدامات تیز کرے، وزیرِ اعظم شہباز شریف

اسلام آباد۔ 10 اگست (اے پی پی) وزیرِ اعظم محمد شہباز شریف ایف بی آر اصلاحات تے عملدرآمد مزید تیز تے ان لینڈ ریونیو کیتے مجوزہ فیس لیس نظام دی بروقت تکمیل دی ہدایت کریندیں ہوئیں آکھیا جو چیئرمین ایف بی آر تے سینئر افسر ہر مہینے کراچی دے نال لاہور اچ وی ݙو ݙینھ قیام کرن، تمام حساس اسامیاں تے اچھی شہرت دے حامل تے ایماندار افسر تے اہلکار تعینات کیتے ونڄن۔ وزیرِ اعظم آفس دے میڈیا ونگ توں جاری بیان دے مطابق وزیرِ اعظم دی صدارت ایف بی آر اچ جاری اصلاحات تے ہفتہ وار جائزہ اجلاس سنوار دے ݙینھ تھیا۔ اجلاس نال خطاب کریندیں ہوئیں وزیرِ اعظم ایف بی آر اصلاحات تے عملدرآمد مزید تیز کرݨ دی ہدایت کیتی۔ انھاں آکھیا جو کاروباری برادری دے جاری ٹیکس اصلاحات تے ودھدے اعتماد دا خیرمقدم کریندن۔ وزیرِ اعظم حکم ݙتا جو چیئرمین ایف بی آر تے سینئر افسر ہر مہینے کراچی دے نال لاہور اچ وی ݙو ݙینھ قیام کرن، ایف بی آر مقررہ ریونیو ہدف دے حصول کیتے انفورسمنٹ اقدامات تیز کرے۔ وزیرِ اعظم ایف بی آر کوں سمگلنگ، ٹیکس چوری تے غیر قانونی کاروبار دے خلاف موثر انفورسمنٹ جاری رکھݨ دی ہدایت کیتی۔ انھاں ایف بی آر ولوں چکوال تے صوابی اچ سگریٹ سازی دی غیر قانونی فیکٹریاں دے خلاف اقدامات دی پذیرائی کیتی۔ وزیرِ اعظم ایف بی آر کوں تمام حساس پوسٹاں تے محکمیاں اچ چنڳی شہرت دے حامل تے ایماندار افسراں تے اہلکاراں دی تعیناتی دی ہدایت کیتی۔ انھاں حکم ݙتا جو ان لینڈ ریونیو کیتے مجوزہ فیس لیس نظام دی بروقت تکمیل تے فیس لیس نظام دا مکمل رول آئوٹ 2027ء تائیں یقینی بݨایا ونڄے۔ وزیرِ اعظم کوں بریفنگ اچ ݙسایا ڳیا جو فیس لیس ان لینڈ ریونیو نظام دا پہلا مرحلہ یکم اکتوبر 2026ء توں فعال تھیسی، اے آئی تے جدید ٹیکنالوجی تے مبنی فیس لیس نظام ایف بی آر دی حالیہ ڈیجیٹائزیشن اصلاحات دا اہم حصہ اے، ایں نظام اچ ٹیکس گوشواریاں دے آڈٹ کیتے نیشنل فیس لیس آڈٹ ونگ تے اسیسمنٹ کیتے فیس لیس اسیسمنٹ یونٹ شامل ہن۔ بریفنگ دے مطابق فیس لیس نظام اچ ٹیکس کیسز دا دائرہ اختیار جغرافیائی حداں توں قطع نظر رینڈم بنیاداں تے مختص کیتا ویسے۔ چیئرمین ایف بی آر وزیرِ اعظم دی ہدایت تے ہر مہینے دے پہلے ہفتے کراچی اچ قیام تے کاروباری برادری نال ملاقاتاں تے وی بریفنگ ݙتی جئیں اچ ݙسایا ڳیا جو کراچی اچ ست وݙے تجارتی اداریاں دے نمائندیاں نال ملاقاتاں کیتیاں تے انھاں دے مسائل سݨے، کراچی اچ قیام دے دوران کاروباری برادری کوں درپیش مسائل فوری حل کیتے ڳئے۔ چیئرمین ایف بی آر ݙسایا جو برآمد کنندگان دے ٹیکس ریفنڈز کیتے ٹائم بائونڈ ایس او پیز جاری کیتے ویندے پئن۔ وزیرِ اعظم کوں ݙتی ڳئی بریفنگ دے مطابق چکوال اچ غیر قانونی سگریٹ فیکٹری دے خلاف انٹیلی جنس بیسڈ کارروائی کریندیں ہوئیں فیکٹری سیل کیتی ڳئی، غیر قانونی سگریٹ دا ذخیرہ تے مشینری قبضے اچ ڳھن ڳھدی ڳئی، صوابی اچ وی غیر قانونی سگریٹ فیکٹری دے خلاف انٹیلی جنس بیسڈ کارروائی کیتی ڳئی۔ اجلاس اچ وفاقی وزرا اعظم نذیر تارڑ، ڈاکٹر مصدق مسعود ملک، احد خان چیمہ، محمد اورنگزیب، عطاء اللہ تارڑ، شزا فاطمہ خواجہ، معاونِ خصوصی ہارون اختر، گورنر سٹیٹ بینک جمیل احمد تے متعلقہ اداریاں دے اعلیٰ افسر شریک ہن۔