خاتونِ اول کورنگی کراچی اچ سینٹر فار آٹزم ری ہیبلیٹیشن اینڈ ٹریننگ اچ خصوصی آٹزم رہائشی مرکز تے جامع پارک دا افتتاح کر ݙتا

کراچی۔ 10 اگست (اے پی پی) خاتونِ اول تے رکنِ قومی اسمبلی بی بی آصفہ بھٹو زرداری تے سندھ دے وزیراعلیٰ سید مراد علی شاہ کورنگی اچ سینٹر فار آٹزم ری ہیبلیٹیشن اینڈ ٹریننگ (C-ARTS) اچ پاکستان دے پہلے خصوصی آٹزم رہائشی مرکز تے پاکستان دے پہلے جامع (Inclusive) پارک دا افتتاح کرݙتا۔ اے اقدام آٹزم دا شکارلوکاں کیتے معاونت تے سہولتاں دے نظام کوں مزید تکڑا بݨاوݨ دے پاسے اہم پیشرفت اے۔ایوانِ صدر دے پریس ونگ توں جاری بیان موجب 2018ء اچ قائم تھیوݨ آلا C-ARTS پاکستان دا پہلا ایجھا آٹزم مرکز اے جتھاں آٹزم دا شکار ٻالاں کیتے تشخیص، بحالی، تعلیم، ہنر مندی دی تربیت تے روزگار کیتے معاونت ہک ہی چھت تلے ݙتی ویندی اے۔ C-ARTS دے کراچی اچ چار مرکز جݙاں جو حیدرآباد، گمبٹ، سکھر، لاڑکانہ تے شہید بینظیرآباد اچ وی مرکز ہن جتھاں مفت سہولتاں، ٹرانسپورٹ تے وظیفے ݙتے ویندن۔ مرکزاچ والدین دی تربیت دے پروگراماں دے نال نال ہک پیشہ ورانہ تربیتی مرکز وی قائم اے۔بریفنگ دے دوران خاتونِ اول کوں ݙسایا ڳیا جو نویں افتتاح کیتے ڳئے رہائشی مرکز اچ جامع نگہداشت، عارضی آرام (Respite) دیاں سہولتاں، بحالی، تربیت تے طویل مدتی معاونت ہک محفوظ تے جامع ماحول اچ ݙتی ویسے۔خاتونِ اول کوں C-ARTS دیاں خدمات کوں ڈیجیٹل بݨاوݨ دے حوالے نال وی بریفنگ ݙتی ڳئی۔ ڈیجیٹلائزیشن دے عمل دے پہلے مرحلے دے تحت C-ARTS رجسٹریشن پورٹل فعال کر ݙتا ڳئے جیں دا مقصد بتدریج کاغذی نظام توں پاک طریقہ کار دے پاسے پیشرفت کرݨ تے ہر ٻال دا ہک واحد ڈیجیٹل ریکارڈ برقرار رکھݨا اے۔خاتونِ اول بی بی آصفہ بھٹو زرداری تے وزیراعلیٰ سندھ سید مراد علی شاہ خصوصی لوکاں کوں بااختیار بݨاوݨ، جامع تعلیم دے دائرہ کار کوں وسعت ݙیوݨ تے ایں ڳالھ کوں یقینی بݨانوݨ دے عزم دا اعادہ کیتا جو ہر ٻال کوں موقع، عزتِ نفس تے ضروری معاونت تئیں رسائی ملے۔