سپیکر قومی اسمبلی سردار ایاز صادق نال ممبر یورپی پارلیمنٹ اوندرے دوستال دی ملاقات

اسلام آباد۔ 10 اگست (اے پی پی) سپیکر قومی اسمبلی سردار ایاز صادق نال ممبر یورپی پارلیمنٹ اوندرے دوستال پارلیمنٹ ہاؤس اچ ملاقات کیتی جیں اچ پاکستان تے یورپی یونین دے سانجھے تعلقات، اہم علاقائی تے عالمی امور تے ڳالھ مہاڑ کیتی ڳئی۔ایں موقع تے ڳالھ کریندیں سپیکر آکھیا جو پاکستان یورپی یونین دے نال اپݨے ݙوطرفہ تعلقات کوں اہمیت ݙیندے، پاکستان تے یورپی یونین وچال پارلیمانی رابطیں کوں مزید مستحکم بݨاوݨ دی لوڑھ اے، پاکستان تے یورپی یونین وچال سانجھے تعاون کوں مزید وسعت ݙیوݨ دے وسیع موقع موجود ہن۔ انھاں آکھیا جو موسمیاتی تبدیلی ہک عالمی چیلنج اے، موسمیاتی تبدیلی نال نبڑݨ کیتے عالمی سطح تے مشترکہ تے مؤثر اقدامات دی لوڑھ اے، پاکستان موسمیاتی تبدیلیاں دے منفی اثرات توں ساریں توں ودھ متاثر تھیوݨ آلے ملکاں دی فہرست اچ شامل اے، پاکستان گرین ہاؤس گیساں دے اخراج اچ ٻہوں معمولی حصہ رکھیندے۔ قومی اسمبلی اچ گرین پارلیمنٹ منصوبہ ماحولیاتی تحفظ تے قابلِ تجدید توانائی دے ودھارے دے عزم دا عملی مظہر اے، موجودہ قومی اسمبلی قانون سازی، پارلیمانی اصلاحات تے عوامی اہمیت دے امور تے مؤثر پیشرفت کیتی۔انھاں آکھیا جو قومی اسمبلی اچ ویمن پارلیمنٹری کاکس، چائلڈ پارلیمنٹری کاکس تے پائیدار ترقی دے اہداف (ایس ڈی جیز) سیکرٹریٹ دا قیام اہم پارلیمانی اقدامات ہن، تریمتاں، ٻالاں دے حقوق تے پائیدار ترقی دے اہداف دے حوالے نال پارلیمان دا کردار مزید مؤثر بݨایا ویندا پئے۔ سپیکر قومی اسمبلی پنجاب اچ مختلف شعبیں اچ تھیوݨ آلی اصلاحات تے ترقیاتی اقدامات دی تعریف کیتی تے آکھیا پنجاب اچ استاداں دی تربیت، فنی تے پیشہ ورانہ تعلیم تے ٻئے شعبیں اچ نمایاں پیشرفت قابلِ تحسین اے، پاکستان کنے باصلاحیت تے ہنرمند افرادی قوت دا وسیع ذخیرہ موجود اے جیں توں یورپی یونین استفادہ کرسڳدی اے، پاکستان تے یورپی یونین وچال تعلیم، ہنرمند افرادی قوت، تربیت تے روزگار دے شعبیں اچ تعاون دے وسیع موقع موجود ہن، امن دے قیام تے خطے اچ استحکام کیتے پاکستان دے کردار کوں عالمی برادری دی طرفوں تعریف کیتی ویندی پئی اےانھاں آکھیا جو پاکستان خطے تے دنیا اچ پائیدار امن تے استحکام چاہندے جھیڑے دے پرامن حل کیتے مذاکرات تے سفارتی ذرائع کوں ترجیح ݙیندے،یورپی یونین دے رکن پاکستان دی علاقائی امن، پارلیمانی سفارتکاری تے بین الاقوامی تعاون کیتے کوششاں دی تعریف کیتی تے آکھیا جو پاکستان تے یورپی یونین وچال دوستانہ تے سانجھے احترام تے مبنی تعلقات اہمیت رکھیندن۔انھاں آکھیا جو پاکستان دے شمالی علاقے قدرتی حسن نال مالا مال ہن۔