آئی ایس پی آر تے ڈی ایچ اے دے تعاون نال شجرکاری مہم 2026 دا آغاز

اسلام آباد۔ 11 اگست (اے پی پی) آئی ایس پی آر تے ڈی ایچ اے انتظامیہ دے تعاون نال شجرکاری مہم 2026 دا آغاز کر ݙتا ڳیا، مہم اچ نوجواناں، خواتین تے شہریاں سمیت مختلف شعبہ ہائے زندگی نال تعلق رکھݨ آلے افراد وݙی تعداد اچ ودھ چڑھ تے حصہ گھدا۔ تفصیلات دے مطابق شجرکاری مہم اچ مختلف سکولاں دے طلبہ تے آئی ایس پی آر انٹرن شپ پروگرام اچ شریک طلبہ وی بھرپور شرکت کیتی تے پودے لاتے۔ مہم اچ شریک افراد آئی ایس پی آر تے ڈی ایچ اے دے تعاون نال شجرکاری مہم دے انعقاد کوں قابلِ تحسین اقدام قرار ݙیندیں ہوئیں آکھیا جو مون سون شجرکاری مہم ملک اچ ہریالی ودھاوݨ تے ماحول دے تحفظ دا بہترین موقع فراہم کریندی اے۔ شرکاء آکھیا جو صرف پاکستان ای نئی بلکہ پوری دنیا موسمیاتی تبدیلی سویں سنگین مسائل دا سامݨا کریندی پئی اے، جئیں دے اثرات نال نبڑݨ کیتے زیادہ توں زیادہ درخت لاوݨ تے جنگلات اچ اضافہ کرݨ دی ضرورت اے۔ انھاں آکھیا جو درخت نہ صرف ماحول کوں صاف رکھݨ اچ اہم کردار ادا کریندن بلکہ موسمیاتی تبدیلی دے منفی اثرات گھٹاوݨ تے آوݨ آلی نسلاں کوں صحت مند ماحول فراہم کرݨ کیتے وی ناگزیر ہن۔ شجرکاری مہم دے شرکاء ایں عزم دا اظہار کیتا جو آوݨ آلی نسلاں دے سرسبز تے صحت مند مستقبل کیتے اڄ توں ای عملی اقدامات کرݨے پوسن اتے شجرکاری کوں قومی ذمہ داری دے طور تے فروغ ݙیوݨا پوسی۔ انھاں آکھیا جو آئی ایس پی آر تے ڈی ایچ اے انتظامیہ دے اشتراک نال شجرکاری مہم 2026 سرسبز تے مضبوط پاکستان دے وژن دی طرف ہک اہم قدم اے۔