وزیرِ اعظم دی صدارت اجلاس، ملک بھر دے کسٹمز بانڈڈ ویئر ہاؤسز دا ترائے سال دا آزادانہ تھرڈ پارٹی آڈٹ کراوݨ دی ہدایت

اسلام آباد۔ 11 اگست (اے پی پی) وزیرِ اعظم محمد شہباز شریف ملک بھر دے کسٹمز بانڈڈ ویئر ہاؤسز دا ترائے سال دا آزادانہ تھرڈ پارٹی آڈٹ کراوݨ دی ہدایت کریندیں ہوئیں آکھیا جو کسٹمز بانڈڈ ویئر ہاؤسز اچ کہیں وی بے ضابطگی دی گنجائش کائنی۔ پی ایم آفس دے میڈیا ونگ دے مطابق وزیرِ اعظم اے ڳالھ منگل دے ݙینھ آپݨے صدارت فیڈرل بورڈ آف ریونیو دے معاملیاں بارے جائزہ اجلاس دے دوران آکھی۔ وزیرِ اعظم حکم ݙتا جو کہیں وی بے ضابطگی تے غیر قانونی سرگرمی اچ ملوث اہلکاراں دے خلاف قانون دے مطابق سخت کارروائی کیتی ونڄے۔ اجلاس اچ کسٹمز بانڈڈ ویئر ہاؤسز تے ان لینڈ ریونیو انفورسمنٹ دے حوالے نال بریفنگ ݙتی ڳئی جئیں اچ ݙسایا ڳیا جو کسٹمز ویئر ہاؤسز اچ پٹرولیم مصنوعات نال متعلق کارگو دی نگرانی وی-باک سسٹم نال منسلک اے، بانڈڈ تجارت ملک دی کل درآمدات دا 16.5 فیصد اے۔ بریفنگ اچ ݙسایا ڳیا جو وزیرِ اعظم دی ہدایت تے ملک بھر دے کسٹمز بانڈڈ ویئر ہاؤسز دی فزیکل سٹاک ویریفیکیشن کروائی ویسے، انھاں دی لائسنسنگ تے سکیورٹی یقینی بݨانوݨ کیتے اقدامات کیتے ویندے پئن، کسٹمز بانڈڈ ویئر ہاؤسز دی ویلیویشن ٹیسٹنگ کروائی ویسے اتے انفارمیشن ٹیکنالوجی سسٹمز دا جائزہ گھدا ویسے۔ وزیرِ اعظم کوں ݙسایا ڳیا جو کسٹمز بانڈڈ ویئر ہاؤسز اچ بے ضابطگیاں کوں ختم کرݨ کیتے ضروری اقدامات کیتے ویندے پئن۔ اجلاس اچ وفاقی وزیر برائے قانون تے انصاف اعظم نذیر تارڑ، وفاقی وزیر برائے اقتصادی امور احد خان چیمہ، وفاقی وزیر برائے موسمیاتی تبدیلی مصدق ملک، وفاقی وزیر خزانہ تے محصولات محمد اورنگزیب، وفاقی وزیر برائے اطلاعات تے نشریات عطاء اللہ تارڑ، وزیر پٹرولیم ڈویژن علی پرویز ملک، وفاقی وزیر برائے انفارمیشن ٹیکنالوجی تے ٹیلی کام شزا فاطمہ، مشیر وزیرِ اعظم ہارون اختر، رکن قومی اسمبلی عثمان اویسی، گورنر سٹیٹ بینک جمیل احمد تے متعلقہ اعلیٰ سرکاری افسران شرکت کیتی۔