وزیرِاعظم دی ہدایت تے این ڈی ایم اے اچ ایمرجنسی رسپانس کمیٹی دا 13واں اجلاس، ساوݨ صورتحال تے ہنگامی تیاریاں دا جائزہ

اسلام آباد۔ 11 اگست (اے پی پی) وزیرِاعظم دی ہدایت تے نیشنل ڈیزاسٹر مینجمنٹ اتھارٹی (این ڈی ایم اے) اچ ایمرجنسی رسپانس کمیٹی دا 13واں اجلاس منعقد تھیا، جیں دی صدارت وفاقی وزیر منصوبہ بندی، ترقی تے خصوصی اقدامات پروفیسر احسن اقبال ویڈیو لنک دے ذریعے کیتی۔اجلاس اچ ملک اچ ساوݨ دی موجودہ صورتحال، دریاواں اچ پاݨی دے وہݨ ، ڈیماں اچ پاݨی دی صورتحال، موسمی پیش گوئیاں، ممکنہ خطرے، ہنگامی تیاریاں تے مختلف اداریں وچال مربوط رسپانس دے اقدامات دا تفصیلی جائزہ ڳھدا ڳئے۔ اجلاس اچ وفاقی وزراء، چیئرمین این ڈی ایم اے، صوبائی ڈیزاسٹر مینجمنٹ اتھارٹیز (پی ڈی ایم ایز)، محکمہ موسمیات تے متعلقہ وفاقی تے صوبائی اداریں دے نمائندیں شرکت کیتی۔صوبائی حکام اجلاس کوں اپݨے اپݨے علاقیں اچ ریسکیو وسائل دی دستیابی، ہنگامی ذخیرے، ممکنہ متاثرہ آبادی دے انخلا دے منصوبیں، ضلعی انتظامیہ دے نال رابطہ کاری تے حساس تے ممکنہ طور تے متاثرہ ضلعیں اچ تیاریاں دے حوالے نال بریفنگ ݙتی۔اجلاس اچ ساوݨ دے دوران ممکنہ ہنگامی صورتحال نال مؤثر انداز اچ نبڑݨ کیتے وقتی موسمی تے چھل دی وارننگز دے اجراء، امدادی تے ریسکیو وسائل دی پیشگی دستیابی تے حساس علاقیں اچ ضروری سامان دی وقتی فراہمی تے خصوصی زور ݙتا ڳیا۔ شرکاء کوں مواصلاتی نظام کوں بلا تعطل فعال رکھݨ، متعلقہ اداریں وچال مؤثر رابطہ کاری یقینی بݨانوݨ تے کہیں وی ہنگامی صورتحال اچ وقتی ردِعمل کیتے سارے رسپانس اداریں کوں مکمل طور تے تیار رکھݨ دی ہدایت کیتی ڳئی۔وفاقی وزیر پروفیسر احسن اقبال آکھیا جو ساوݨ دے دوران کہیں وی ممکنہ خطرے نال نبڑݨ کیتے پیشگی تیاری تے وقتی رسپانس بنیادی اہمیت رکھیندن۔ انھاں سارے متعلقہ اداریں کوں ہدایت کیتی جو سانجھی رابطہ کاری کوں مزید مؤثر بݨایا ونڄے تے ممکنہ خطرات دے پیشِ نظر حفاظتی تے رسپانس اقدامات تے وقتی عملدرآمد یقینی بݨایا ونڄے۔ انھاں زور ݙتا جو متعلقہ ادارے موسمی پیش گوئیاں تے وارننگز کوں وقتی متعلقہ اضلاع تے عوام تئیں پڄاوݨ کیتے مؤثر نظام برقرار رکھن تاں جو کہیں وی ممکنہ نقصان کوں گھٹ توں گھٹ کیتا ونڄ سڳے۔پروفیسر احسن اقبال ہدایت کیتی جو سارے صوبائی تے وفاقی ادارے اپݨی تیاریاں دا مسلسل جائزہ گھندے رہن تے لوڑھ پووݨ تے ریسکیو، ریلیف تے انخلا دے وسائل فوری طور تے متحرک کرݨ کیتے مربوط لائحہ عمل یقینی بݨاون۔ اجلاس اچ ساوݨ صورتحال دی مسلسل نگرانی تے متعلقہ اداریں دے وچال نیڑے رابطہ برقرار رکھݨ تے اتفاق کیتا ڳیا۔