سی پیک دا پہلا مرحلہ توانائی تے بنیادی ڈھانچے دے بحران اچ مددگار ثابت تھئے، ہݨ توجہ صنعت کاری تے کاروباری شراکت داری تے مرکوز اے، احسن اقبال

اسلام آباد۔ 11 اگست (اے پی پی) وفاقی وزیرمنصوبہ بندی، ترقی، اصلاحات تے خصوصی اقدامات پروفیسر احسن اقبال آکھیے جو چین پاکستان اقتصادی راہداری (سی پیک) دا پہلا مرحلہ پاکستان کوں توانائی تے بنیادی ڈھانچے دے بحران توں کݙھݨ اچ سنگِ میل ثابت تھیا جݙاں جو سی پیک 2.0 دے تحت ساݙی توجہ انفراسٹرکچر توں صنعت کاری تے حکومتی سطح دے رابطیں توں کاروباری سطح دی شراکت داری دی طرف منتقل تھی چکی اے۔اے ڳالھ انہاں چین دے اکنامک افیئرز پریس دے سینئر ایڈوائزر مسٹر سن ڈونگ شینگ دی قیادت اچ پاکستان آوݨ آلے اعلیٰ سطحی وفد دے نال سی پیک سیکرٹریٹ، وزارتِ منصوبہ بندی تے ترقی اچ منعقدہ اہم اجلاس دے دوران آکھی۔وفاقی وزیر آکھیا جو سی پیک فیز ون پاکستان دے توانائی تے بنیادی ڈھانچے دے بحران مکاوݨ اچ اہم کردار ادا کیتا۔ ہݨ سی پیک فیز ٹو دے تحت ملک اچ صنعتی، زرعی تے تکنیکی ترقی دے نویں موقع پیدا کیتے ویندے پئن۔ انھاں آکھیا جو وزیرِاعظم محمد شہباز شریف دے قومی معاشی ایجنڈے ’’اڑان پاکستان‘‘ دے تحت پاکستان صنعتی انقلاب 4.0 تے 5.0 توں بھرپور فیدہ چاوݨ چاہندے، ایں مقصد کیتے نیشنل سینٹر آف نیو مینوفیکچرنگ دے ذریعے چین دے جدت، آٹومیشن تے روبوٹکس دے شعبیں اچ حاصل تجربیں تے مہارت توں فیدہ چاوݨ دی تجویز پیش کیتی ڳئی اے۔پروفیسر احسن اقبال آکھیا جو پاکستان دا ساریں توں وݙا معاشی چیلنج کمزور برآمدات ہن، چین سالانہ تقریباً 2.6 ٹریلین ڈالر دی برآمدات کریندا پئے جݙاں جو پاکستان دی چین کوں برآمدات ایں ویلھے تقریباً 3 ارب ڈالر ہن۔ انھاں آکھیا جو جیویں سی پیک فیز ون پاکستان دے انرجی خسارے کوں ختم کرݨ اچ مدد ݙتی ایویں سی پیک فیز ٹو دا ہدف ملک دے ایکسپورٹ خسارے دا خاتمہ اے۔وفاقی وزیرزراعت، صنعت تے کان کنی دے شعبیں اچ پاکستان تے چین دے اداریں وچال اڄوکے معاہدیں کوں خوش آئند قرار ݙیندیں آکھیا جو اے معاہدے ݙوہیں ملکاں وچال اقتصادی تعاون کوں مزید وسعت ݙیوݨ تے پاکستان اچ معاشی خوشحالی دے نویں رستے کھولݨ اچ معاون ثابت تھیسن۔ انھاں آکھیا جو سی پیک 2.0 دے تحت بی ٹو بی تعاون، ٹیکنالوجی منتقلی، صنعتی جدید کاری، زرعی ترقی تے ویلیو ایڈیشن تے خصوصی توجہ ݙتی ویندی پئی اے جݙاں جو چھوٹے تے درمیانے درجے دے کاروباری اداریں کوں وی پاک چین معاشی تعاون اچ فعال طور تے شامل کیتا ویسے۔چین دے اکنامک افیئرز پریس دے سینئر ایڈوائزر مسٹر سن ڈونگ شینگ سی پیک دے پہلے مرحلے دیاں کامیابیاں دی تعریف کیتی تے صنعت، زراعت تے ایس ایم ایز دے شعبیں اچ پاکستان تے چین وچال رابطیں تے سانجھے تعاون کوں مزید تکڑا بݨاوݨ دے عزم دا اظہار کیتے ۔اجلاس اچ سی پیک 2.0 دے تحت صنعتی تے زرعی جدید کاری، ٹیکنالوجی، B2B رابطیں تے ݙوہیں ملکاں دے کاروباری اداریں وچال تعاون کوں مزید ودھارا ݙیوݨ دے امور تے ڳالھ مہاڑ کیتی ۔وفاقی وزیر آکھیا جو پاکستان دا واضح ہدف سی پیک 2.0 دے پنج اقتصادی راہداریاں کوں ’’اڑان پاکستان‘‘ دے 5Es فریم ورک دے نال مکمل طور تے ہم آہنگ کرݨا اے تاں جو ملک کوں جدید صنعتی، زرعی تے تکنیکی معیشت دی رستے تے ٹوریا ونڄ سڳے۔ انھاں ایں عزم دا اظہار کیتا جو حکومت سی پیک دے ݙوجھے مرحلے کوں ملک دی معاشی ترقی، برآمدات اچ ودھارے ، روزگار دے موقع پیدا کرݨ تے جدید ٹیکنالوجی دے ودھارے دا اہم ذریعہ بݨاوݨ کیتے سارے ضروری اقدامات جاری رکھیسی۔