قائداعظم دی سوچ دے مطابق سارے شہریاں کوں بغیر وانڄھ دے مونݙھا رلا تے ملکی تعمیر و ترقی اتے خوشحالی اچ نال کھڑاوݨے، وزیرِ اعظم محمد شہباز شریف

اسلام آباد۔ 11 اگست(اے پی پی)وزیرِ اعظم محمد شہباز شریف قیامِ پاکستان توں تعمیرِ پاکستان تئیں ڄیوݨ دے ہر شعبے اچ مسلماناں دے مونݙھے نال مونݙھا رلا تے کھڑݨ دے اقلیتاں دے کردار کوں خراجِ تحسین پیش کریندے آکھیے جو قائداعظم دی سوچ دے مطابق سارے شہریاں کوں بغیر وانڄھ دے مونݙھا رلا تے ملکی تعمیر و ترقی اتے خوشحالی اچ نال کھڑاوݨے، قائدِ اعظم محمد علی جناح دے فرمان دے مطابق آئینِ پاکستان اچ سارے پاکستانیاں کوں ہکو سویں حقوق ہین۔ وزیرِ اعظم آفس اسلام آباد اچ مذہبی اقلیتاں دے قومی ݙینھ سانڳے تقریب نال الیندے انہاں آکھیا جو 11 اگست کوں پاکستان اچ وسݨ والی اقلیتاں دے قومی ݙینھ دے طور تے منایا ویندے، مسیحی، ہندو، سکھ اتے پارسی کمیونٹی سودھا ساریاں اقلیتاں دے بھراواں اتے ٻھیݨیں دا ساݙے دل اچ ݙاݙھا احترام اے، اقلیتاں تحریکِ پاکستان اچ قائدِ اعظم دا ساتھ ݙے تے تعمیری کردار ادا کیتے جیڑھا تاریخ دا حصہ اے، قائدِ اعظم دے 11 اگست دے خطاب دے مطابق اقلیتاں کوں آئینِ پاکستان اچ مساوی حقوق حاصل ہن، اقلیتی برادریاں پاکستان دی تعمیر و ترقی کیتے ودھ کردار ادا کیتے، تعلیم دے میدان اچ کرسچن کمیونٹی دیاں خدمات دی ستائش نہ کرݨ ناانصافی ہوسی۔ وزیرِ اعظم سیسل چوہدری، جسٹس اے آر کارنیلئیس، جوگندر ناتھ منڈل، ایس ایل گبز اتے ایس پی سنگھا سودھا مختلف اقلیتی برادریاں دے پاکستانیاں اتے قومی شخصیتاں دا ݙسیندے آکھیا جو اے خدمات کون نئیں ڄاݨدا؟ اقلیتاں جنگاں اتے قومی تعمیر دے ہر میدان اچ بے بہا خدمات سر انجام ݙتین، ملکی دفاع کیتے وی انھاں دیاں قربانیاں نا ٻھلݨ آلیاں ہین اتے دہشت گردی دے خلاف جنگ اچ وی انھاں اپݨیاں جاناں وارین۔ وزیرِ اعظم آکھیا جو اساں ساریاں پاکستان دی ترقی اتے خوشحالی کیتے مل تے کم کرݨے، نوجواناں کوں جدید علوم نال آراستہ کر تے پاکستان کوں دنیا اچ اچا مقام ݙیواوݨے۔ وزیرِ اعظم آکھیا جو قیامِ پاکستان دے مقاصد کوں ݙیہدے ہوئے اڳو تے ودھݨے اتے پاکستان کوں اقوامِ عالم اچ ایںدا مقام ݙیواوݨے۔ وزیرِ اعظم آکھیا جو سعودی عرب، پاکستان، ترکیہ دا مکہ دفاعی معاہدہ کہیں ملک دے خلاف نئیں، اے امن، ترقی اتے خوشحالی ودھاوݨ کیتے اے۔ ایں موقع تے وزیرِ اعظم ملک کیتے نمایاں خدمات انجام ݙیوݨ والی اقلیتی برادری دی شخصیتاں کوں ایوارڈز اتے اعزازات وی ݙتن۔ تقریب اچ وفاقی وزیر برائے مذہبی امور سردار محمد یوسف، وزیرِ مملکت برائے مذہبی بین المذاہب ہم آہنگی کھیئل داس کوہستانی اتے سینیٹر خلیل طاہر سندھو وی خطاب کیتے۔