پاکستان بیلاروس مشترکہ وزارتی کمیشن ݙو پاسہ تعلقات دا اہم ستون اے، جام کمال خان

اسلام آباد۔ 12 اگست (اے پی پی) وفاقی وزیرِ تجارت جام کمال خان آکھیا جو پاکستان بیلاروس مشترکہ وزارتی کمیشن ݙو پاسہ تعلقات دا اہم ستون اے، مشترکہ وزارتی کمیشن ݙونھائیں ملکاں کوں ترجیحات دے تعین، پیش رفت دے جائزے تے تعاون کوں اسٹریٹجک سمت ݙیوݨ دا موثر پلیٹ فارم فراہم کریندے۔ اے ڳالھیں انھاں بدھ دے ݙینھ پاکستان بیلاروس مشترکہ وزارتی کمیشن دے اجلاس نال خطاب اچ کیتا۔ وفاقی وزیرِ تجارت جام کمال خان آکھیا جو پاکستان تے بیلاروس دے تعلقات آپسی اعتماد، احترام، مساوات تے مشترکہ خوشحالی دے عزم تے قائم ہن، عالمی اقتصادی منظرنامے اچ تیزی نال تبدیلی آندی پئی اے، ݙو طرفہ شراکت داری کوں عملی تے نتیجہ خیز تعاون اچ بدلݨا ہوسی۔ انھاں آکھیا جو تعاون دے حقیقی فوائد کاروباری برادری، ہنرمند افراد تے ݙونھائیں ملکاں دی عوام تائیں پجݨے چاہیدن، جے ایم سی اجلاس اچ تھیوݨ آلی ڳالھ مہاڑ پائیدار تے مستقبل تے مبنی پاکستان بیلاروس شراکت داری دی پاسے اہم پیش رفت اے۔جام کمال خان آکھیا جو زراعت تے فوڈ سکیورٹی پاکستان بیلاروس تعاون دے اہم ستون ہن، زرعی ٹیکنالوجی، بیج، پیداوار اچ بہتری تے فوڈ سکیورٹی دے شعبیاں اچ تعاون دے وسیع امکانات موجود ہن، ٹرانسپورٹ تے انفراسٹرکچر دے شعبیاں اچ تعاون نال ݙو پاسہ تجارت تے پیداواری صلاحیت اچ اضافہ تھیسی۔ تقریب نال خطاب اچ بیلاروس دے وزیرِ توانائی دزیانس ماروز 9ویں پاکستان بیلاروس مشترکہ وزارتی کمیشن دے اجلاس نال خطاب اچ آکھیا جو اڄوکا مشترکہ وزارتی کمیشن ݙونھائیں ملکاں دے اعلیٰ سطحی رابطیاں کوں ٻیا اڳوں ودھاوݨ کیتے اہم بنیاد فراہم کریسی۔ پاکستان تے بیلاروس دی قیادت دے درمیان رابطے انتہائی دوستانہ تے اعلیٰ سطح تے قائم ہن۔بیلاروسی وزیرِ توانائی آکھیا جو زراعت دے شعبے اچ مشترکہ تعاون نال وی مثبت تے عملی نتائج حاصل تھیوݨ دی توقع اے، پاکستان تے بیلاروس وچال مختلف شعبیاں اچ تعاون دے دے وسیع امکانات موجود ہن، ݙونھائیں ملک مشترکہ کوششاں دے ذریعے ݙو پاسہ تعاون اچ ٻئی نمایاں پیش رفت حاصل کریسن۔