پاکستان، بیلاروس وچال زرعی تجارت، سرمایہ کاری تے ٹیکنالوجی دے تعاون دے نویں امکانات روشن

اسلام آباد۔ 12 اگست (اے پی پی) وفاقی وزیر برائے قومی غذائی تحفظ تے تحقیق رانا تنویر حسین اسلام آباد اچ بیلاروس دے نائب وزیرِ زراعت تے خوراک یاکووچٹس الیگزینڈر نال ملاقات کیتی، جیندے اچ زراعت، غذائی تحفظ، تجارت، سرمایہ کاری تے زرعی ٹیکنالوجی دے شعبیاں اچ ݙو پاسہ تعاون کوں ٻیا مضبوط بݨانوݨ دے نویں امکانات تے ڳالھ مہاڑ کیتی۔ملاقات دے دوران ݙونھائیں پاسوں پاکستان تے بیلاروس دے کاروباری اداریاں تے متعلقہ اسٹیک ہولڈرز دی ݙونھائیں ملکاں اچ منعقد تھیوݨ آلیاں فوڈ نمائشاں تے زرعی تجارتی میلیاں اچ زیادہ توں زیادہ شرکت دی حوصلہ افزائی تے اتفاق کیتا ڳیا۔ ݙونھائیں پاسوں سمندری خوراک، ترش پھلاں،امٻ، فروٹ پیوری، سبزیاں بالخصوص آلو، بیجاں تے ڈیری مصنوعات دے شعبیاں اچ آن لائن بزنس ٹو بزنس (بی 2بی) سیشنز دے انعقاد اچ سہولت فراہم کرݨ تے وی اتفاق کیتا ڳیا۔ انھاں سیشنز نال ݙونھائیں ممالک دے کاروباری اداریاں کوں ہک ٻئے نال منسلک کرݨ، ݙو طرفہ تجارت دے فروغ تے تجارتی رابطیاں کوں ٻیا مضبوط بݨانوݨ اچ مدد ملسی۔پاکستانی پاسوں پاکستان ایگریکلچرل ریسرچ کونسل (PARC) اچ بیلاروس دی مالی تے تکنیکی معاونت نال یونیورسل زرعی مشینری ٹیسٹنگ سہولت یا مرکز قائم کرݨ دی تجویز پیش کیتی ڳئی۔ بیلاروسی پاسوں ایں تجویز دا نوٹس گھدا ڳیا۔ ݙونھائیں ممالک پلانٹ کوارنٹائن دے متعلقہ اداریاں وچال استعدادِ کار اچ اضافے کیتے تعاون تلاش کرݨ تے وی اتفاق کیا تانجو فائیٹو سینیٹری نظام کوں ٻیا مضبوط بݨایا ونڄ سڳے۔ وفاقی وزیر رانا تنویر حسین تے بیلاروس ولوں پاکستان تے بیلاروس وچال ودھدے ہوئے تعاون تے اطمینان دا اظہار کیتا اتے زراعت، غذائی تحفظ، تجارت، سرمایہ کاری، آبی زراعت، بیجاں دی تجارت، زرعی مشینری تے فائیٹو سینیٹری تعاون دے شعبیاں اچ آپسی مفاد تے مبنی شراکت داریاں کوں فروغ ݙیوݨ دے عزم دا اعادہ کیتا۔