وفاقی وزیرِ منصوبہ بندی، ترقی و خصوصی اقدامات نال چینی کمیونسٹ پارٹی دے وفد دی ملاقات، ݙوپاسے تعلقات تے سی پیک 2.0 کوں مزید وسعت ݙیوݨ تے ڳالھ مہاڑ

اسلام آباد۔ 12 اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال نال چینی کمیونسٹ پارٹی دے وفد ملاقات کیتی، جیندے اچ پاک چین ݙو طرفہ تعلقات، سیاسی تے جماعتی رابطے، سی پیک 2.0 تے ݙونھائیں ملکاں وچال ترقیاتی تعاون کوں مزید وسعت ݙیوݨ تے ڳالھ مہاڑ کیتی ڳئی۔ملاقات دے دوران وفاقی وزیر آکھیا جو پاکستان تے چین دی دوستی سانجھے اعتماد، سیاسی اتفاقِ رائے تے ہراوکھے ویلھے اچ ہک ٻئے دی حمایت تے مبنی اے۔ انھاں آکھیا جو 2013ء اچ جݙݨ پاکستانی سرمایہ کار پاکستان اچ سرمایہ کاری توں ہچکچیندے پئے ہن، ایں ویلھے چین پاکستان اچ سرمایہ کاری دا فیصلہ کیتا جو ݙوہیں ملکاں وچال مضبوط اعتماد دا مظہر اے۔پروفیسر احسن اقبال آکھیا جو سی پیک دی کامیابی پاکستان تے چین دی قیادت دے مضبوط سیاسی عزم تے پختہ ارادے دا نتیجہ اے۔ انھاں آکھیا جو پاکستان چینی کمیونسٹ پارٹی دی تنظیم، قیادت، طرزِ حکمرانی تے طویل المدتی منصوبہ بندی دے تجربے توں سکھݨ اچ گھاٹی دلچسپی رکھیندے۔ وفاقی وزیر آکھیا جو پاکستان تے چین وچال پنج سیاسی راہداریاں دے تحت منظم تعاون کوں ودھارا ݙیوݨ چاہندوں۔ جو سی پیک 2.0 کیتے سیاسی تے ادارہ جاتی بنیاد ݙے سڳدن۔ انھاں آکھیا جو جماعتی رابطیں، پالیسی تبادلیں تے نوجوان قیادت دے سانجھے رابطیں کوں مزید تکڑا بݨاوݨ دی لوڑھ اے۔انھاں چینی نوجوان سیاسی قیادت کوں پاکستان آوݨ دی دعوت ݙیندیں آکھیا جو نوجواناں دے سانجھے تبادلے آندی نسل دی قیادت اچ پاک چین دوستی دے مضبوط رشتے قائم کرݨ اچ اہم کردار ادا کریسن۔ چینی نوجوان قیادت پاکستان دا دورہ کرتے ݙونھائیں ملکاں دے عوام تے نوجواناں وچال رابطیں کوں مزید ودھاراݙے سڳدی اے۔پروفیسر احسن اقبال آکھیا جو سی پیک 2.0 کوں اڑان پاکستان دے فائیو ایز فریم ورک دے نال ہم آہنگ کیتا ویندا پئے تاں جو پیداوار، جدت، گرین انرجی، برآمدات تے علاقائی رابطیں کوں ودھارا ݙتا ونڄ سڳے۔ انھاں آکھیا جو پاکستان سی پیک دے ݙوجھے مرحلے اچ صنعتی، زرعی، ٹیکنالوجی تے ٻئے شعبیں اچ تعاون کوں مزید وسعت ݙیوݨ کیتے پرعزم اے۔ایں موقع تے چینی کمیونسٹ پارٹی دے نمائندے لیو ڈاشیو سی پیک دی ترقی اچ پروفیسر احسن اقبال دے کردار دی تعریف کریندے آکھیا جو سی پیک دی کامیابی اچ احسن اقبال دا اہم کردار اے، ایں کیتے چینی حلقیں اچ انھاں کوں محبت نال ’’مسٹر سی پیک‘‘ آکھیا ویندے۔ لیو ڈاشیو آکھیا جو چین پاکستان دے نال رل تے ترقی تے مشترکہ مستقبل دی تعمیر کیتے مسلسل کم کریندا رہسی۔ انھاں آکھیا جو چین سی پیک 2.0، پاکستان دے فائیو ایز تے اعلیٰ معیار دے بیلٹ اینڈ روڈ تعاون کوں مزید اڳوں ودھاوݨ کیتے پرعزم اے