وفاقی وزیرِ خزانہ محمد اورنگزیب نال بیلاروس دے وزیرِ توانائی دی ملاقات، اقتصادی تعاون مزید تکڑا کرݨ تے ڳالھ مہاڑ

اسلام آباد۔ 12 اگست (اے پی پی) وفاقی وزیرِخزانہ و محصولات سینیٹر محمد اورنگزیب نال جمہوریہ بیلاروس دے وزیرِ توانائی ڈینس موروزاعلیٰ سطحی وفد دے رلے ملاقات کیتی جیندے اچ ݙو طرفہ اقتصادی تعلقات، تجارت و سرمایہ کاری تے پاکستان تے بیلاروس وچال اقتصادی تعاون مزید مستحکم کرݨ دے مختلف طریقیں تے ڳالھ مہاڑ کیتی ڳئی ۔وفاقی وزیرِ خزانہ بیلاروس دے وفد دا خیرمقدم کریندیں ݙوہیں ملکاں وچال پراݨے رابطیں دا ذکر کیتا تے آکھیا جو اقتصادی تعاون دے ودھدے دائرہ کار کوں مزید وسعت ݙیوݨ کیتے تجارتی رابطیں تے سرمایہ کاری دے حجم اچ ودھارا ضروری اے۔ سینیٹر محمد اورنگزیب ݙوہیں ملکاں وچال مسلسل رابطیں دی اہمیت تے زور ݙیندیں آکھیا جو اقتصادی رابطیں کوں ودھارا ݙیوݨ کیتے مشاورت دا عمل مزید وسیع کیتا ونڄݨا چاہیدے۔ملاقات اچ پاکستان تے بیلاروس وچال صنعتی تعاون، زراعت، تعلیم، ثقافت تے ٻئے شعبیں اچ تعاون دے وسیع ترایجنڈے تے وی ڳالھ تھئی۔ بیلاروسی وفد انھاں شعبیں اچ تعاون کوں اڳوں ودھاوݨ کیتے جاری کوششاں دا ݙسایا۔ وزیرِ خزانہ سانجھی دلچسپی دے شعبیں اچ جاری رابطیں کوں ٹھوس نتیجے اچ تبدیل کرݨ تے پاکستان تے بیلاروس وچال تعاون کوں مزید تکڑا بݨاوݨ کیتے بیلاروسی حکام دے نال نیڑے تعاون جاری رکھݨ دے عزم دا اعادہ کیتا۔بیلاروس دے وزیرِ توانائی ڈینس موروز وزیرِ خزانہ دی طرفوں تعاون دی تعریف تے ایں اعتماد دا اظہار کیتا جو ݙوہیں ملکاں دے متعلقہ اداریں وچال مسلسل رابطہ ݙو طرفہ تجارت، سرمایہ کاری تے اقتصادی تعاون کوں مزید ودھارا ݙیوݨ اچ معاون ثابت تھیسی۔ملاقات اچ وزارتِ اقتصادی امور دے سیکرٹری دے علاوہ بیلاروس دے وفد دے ارکان، پاکستان اچ بیلاروس دے سفیر آندرے میتلیسا، صنعت دے اول نائب وزیر وکٹر شیٹکو، وزارتِ خارجہ بیلاروس دے ڈائریکٹر شعبہ آندرے پروکوپچک تے نیشنل بینک آف دی ریپبلک آف بیلاروس دے وکٹر نیکیتن شرکت کیتی۔ وزارتِ خزانہ دے سینئر حکام وی ایں موقع تے موجود ہن۔