آزاد جموں و کشمیر اچ انتخابات دے ترائے مرحلے مکمل تھی چکئن، پاکستان مسلم لیگ (ن) کوں واضح برتری حاصل اے، ڈاکٹر طارق فضل چوہدری

اسلام آباد۔ 12 اگست (اے پی پی) وفاقی وزیرِ پارلیمانی امور ڈاکٹر طارق فضل چوہدری آکھیے جو آزاد جموں و کشمیر اچ انتخابات دے ترائے مرحلے مکمل تھی چکئن جنھاں اچ پاکستان مسلم لیگ (ن) کوں واضح برتری حاصل تھئی اے، ݙوجھے مرحلے دے اختتام تے مسلم لیگ (ن) 24 نشستاں حاصل کرچکی اے، فارمولے دے تحت 3 تریمتاں تے 3 ٻئی مخصوص نشستاں وی (ن) لیگ کوں ملسن۔ سماجی رابطہ دی ویب سائٹ ایکس تے اپݨے ہک بیان اچ انھاں آکھیا جو مخصوص نشستاں اچ اوورسیز، ٹیکنوکریٹ تے علماء و مشائخ دیاں سیٹاں شامل ہن، مسلم لیگ (ن) دی مجموعی طور تے کل نشستاں دی تعداد 30 تھی ویسے، اڳلے ہفتے آزاد کشمیر قانون ساز اسمبلی دا اجلاس سݙوایا ویسے، اسمبلی اجلاس اچ اراکین دا حلف تے مخصوص نشستاں تے الیکشن تھیسی، اڳلے ہفتے ہی سپیکر تے وزیرِاعظم آزاد کشمیر دا انتخاب وی مکمل کرڳھدا ویسے۔وفاقی وزیر آکھیا جو آزاد کشمیر اچ ہک مستحکم تے تکڑی حکومت قائم تھیوݨ ویندی پئی اے، موجودہ حالات سامݨے رکھیندیں آزاد کشمیر اچ مضبوط حکومت دا قیام ضروری اے، آزاد جموں و کشمیر اچ مجموعی طور تے انتخابات صاف، شفاف تے کریڈیبل تھئے۔ انھاں آکھیا جو آزاد کشمیر الیکشن اچ کہیں وی بدنظمی یا دھاندلی دی کارروائی دے خلاف زیرو ٹالرنس رہی اے، ایل اے 6 میرپور اچ پولنگ سٹیشن توں بیلٹ باکس چاوݨ آلے امیدوار کوں وقتی گرفتار کیتا ڳیا، انتظامیہ، قانون نافذ کرݨ آلے اداریں تے الیکشن کمیشن کوں شفاف انتخابات تے مبارخ ݙینداں۔ڈاکٹر طارق فضل چوہدری آکھیا جو شفاف الیکشن نال الیکشن کمیشن، انتظامیہ تے قانون نافذ کرݨ آلے اداریں دی ساکھ اچ ودھارا تھئے، حویلی اچ ساݙے امیدوار محسن عزیز دی دھاندلی دی شکایت تے شفاف تحقیقات تھیوݨیاں چاہیدن، امید اے الیکشن کمیشن حویلی دے حلقے نال متعلق شکایتاں دا ازالہ میرٹ تے کریسی۔