وزیرِاعلیٰ پنجاب مریم نواز شریف نال قائم مقام امریکی سفیر دی نیٹلی بیکر دی ملاقات، اے آئی، ڈیجیٹل اثاثیں تے انرجی جیھے شعبیں اچ تعاون تے اتفاق

لاہور۔ 12 اگست (اے پی پی) وزیرِاعلیٰ پنجاب مریم نواز شریف نال قائم مقام امریکی سفیر نیٹلی بیکر ملاقات کیتی جنھاں دا پرتپاک خیرمقدم کیتا ڳیا۔ ملاقات اچ پنجاب اچ ودھارا تعلیم، سکیورٹی تے سرمایہ کاری متعلق ڳالھ مہاڑ کیتی ڳئی۔قائم مقام امریکی سفیر نیٹلی بیکر وزیرِاعلیٰ مریم نواز شریف کوں تریمتاں کیتے پراجیکٹس تے خراجِ تحسین پیش کیتا۔ ملاقات اچ سکیورٹی، آرٹیفیشل انٹیلی جنس (اے آئی)، ڈیجیٹل اثاثیں تے انرجی جیھے شعبیں اچ تعاون تے اتفاق کیتا ڳیا۔ ایں موقع تے پنجاب اچ چھل تے سموگ توں بچݨ کیتے امریکی ایکسپرٹ دیاں خدمات حاصل کرݨ تے وی اتفاق کیتا ڳیا۔ لاہور اچ پنجاب یو ایس بزنس اینڈ انویسٹمنٹ فورم دے انعقاد دی تجویز دا جائزہ ڳھدا ڳیا۔قائم مقام امریکی سفیر نیٹلی بیکر لاہور اچ بسنت فیسٹیول دے انعقاد دی تعریف کیتی ۔ قائم مقام امریکی سفیر نیٹلی بیکر محفوظ بسنت کیتے حکومتِ پنجاب دے اقدامات کوں خراجِ تحسین پیش کیتا۔ قائم مقام امریکی سفیر نیٹلی بیکر آکھیا جو پاکستان ٻہوں پسند اے، بالخصوص پنجاب تے لاہور دے لوک زندہ دل ہن۔وزیرِاعلیٰ مریم نواز شریف ڳالھ کریندے آکھیا جو آندے سال بسنت میلے کوں مزید توسیع ݙیسوں۔ پنجاب اچ تریمتاں کوں بااختیار بݨاوݨ کیتے قانونی اقدامات کریندے پیوں۔ پنجاب اچ ترقی، ماحولیاتی تبدیلیاں دی پالیسی بݨیندی پئی اے۔ امریکہ اچ رہݨ آلے 10 لکھ پنجاب دے اوورسیز پاکستانی ملک دا قابلِ قدر اثاثہ ہن۔ ساوݨ اچ پیشگی اقدامات تے ڈسٹرکٹ واساز دے قیام نال مینھ دے پاݨی دے وقتی نکاسی کوں ممکن بݨایا ڳیا۔وزیرِاعلیٰ آکھیا جو پنجاب بدلدا پئے، پنجاب دے شہر تے دیہات ری فارم تھیندے پئن۔ پاکستان دی پہلی تریمت وزیرِاعلیٰ ہووݨ دی حیثیت نال وویمن ایمپاورمنٹ کوں محض علامتی نی بلکہ عملی شکل ݙتی اے۔ پنجاب اچ تریمتاں دی آونڄ اچ سوکھ کیتے الیکٹرک سکوٹی تے الیکٹرک بس سروس شروع کیتی ڳئی اے۔ وزیرِاعلیٰ مریم نواز شریف آکھیا جو تریمتاں کوں مالی خودمختاری دے رستے تے ٹورݨ کیتے سمال بزنس کیتے بلاسود قرضے ݙتے ویندے پئن۔ تریمتاں دے تحفظ کیتے ڈائریکٹ پنک بٹن تے ورچوئل پولیس اسٹیشن پہلا اقدام اے۔