صدرِ مملکت آصف علی زرداری دا اقوامِ متحدہ نال پاکستان دی شراکت داری ٻئی تکڑی کرݨ تے زور

اسلام آباد۔ 12 اگست(اے پی پی)صدرِ مملکت آصف علی زرداری اقوامِ متحدہ نال پاکستان دی شراکت داری ٻئی تکڑی کرݨ بالخصوص پائیدار ترقی، موسمیاتی تبدیلی، غربت مکاوݨ، تعلیم اتے سماجی تحفظ دے شعبیاں اچ تعاون ودھاوݨ تے زور ݙتے۔ انہاں اے ڳالھ پاکستان اچ اقوامِ متحدہ دے ریزیڈنٹ کوآرڈینیٹر محمد یحییٰ نال ملݨ ویلھے آکھی، جنھاں ایوانِ صدر اچ الوداعی ملاقات کیتی۔ صدر آصف علی زرداری آکھیا جو پاکستان اقوامِ متحدہ نال اپݨے قریبی اتے کثیرالجہتی تعاون کوں ݙاݙھی اہمیت ݙیندے، اساں قومی ترقی دیاں ترجیحاں ودھاوݨ کیتے اقوامِ متحدہ دی کنٹری ٹیم نال رل تے کم کرݨ چاہندے ہیں۔ صدرِ مملکت پولیو مکاوݨ کیتے پاکستان دیاں کوششاں کیتے اقوامِ متحدہ دی مسلسل حمایت کوں سراہیا۔ انھاں بینظیر نشوونما پروگرام سودھا ماں، نوزائیدہ اتے ٻالاں دی صحت اتے غذائیت دیاں خدمات کیتے اقوامِ متحدہ دے تعاون کوں وی سراہیا۔ صدرِ مملکت آکھیا جو پاکستان پائیدار ترقی کیتے پرعزم اے اتے موسمیاتی تبدیلی دے منفی اثرات نال نمٹݨ کیتے اقدامات جاری رکھسوں۔ انھاں لیونگ انڈس انیشی ایٹو اتے ری چارج پاکستان سودھا مختلف اقدامات دی تعریف کریندے امید کیتی جو اقوامِ متحدہ ترقیاتی اتے موسمیاتی مالی معاونت حاصل کرݨ کیتے پاکستان دی کوششاں دی حمایت جاری رکھسی، پاکستان اتے اقوامِ متحدہ وچال اقوامِ متحدہ دے پائیدار ترقی دے تعاون دے فریم ورک 2023-27ء دے تحت مزید پیش رفت جاری رہسی۔ محمد یحییٰ صدرِ مملکت کوں ݙسایا جو انھاں کوں اقوامِ متحدہ دے دفتر برائے رابطہ برائے انسانی امور (OCHA) اچ اسسٹنٹ سیکریٹری جنرل مقرر کیتا ڳئے اتے او ستمبر 2026ء تئیں اپݨیاں نویاں ذمہ داریاں سنبھال گھنسن۔