یومِ آزادی اساکوں اپݨی تاریخ نال وابستگی، قومی ذمہ واریاں دے احساس تے مستقبل کیتے اجتماعی عزم دی تجدید دا درس ݙیندے، سپیکر قومی اسمبلی سردار ایاز صادق

اسلام آباد۔ 13 اگست (اے پی پی) سپیکر قومی اسمبلی سردار ایاز صادق آکھیے جو 14 اگست ساݙی قومی تاریخ دا ہک تابناک ݙینھ اے، اے ݙینھ اساکوں آزادی دی عظیم نعمت تے اللہ تعالیٰ دا شکر ادا کرݨ، قیامِ پاکستان کیتے ݙتیاں ڳئیاں لازوال قربانیاں کوں خراجِ تحسین پیش کرݨ تے وطنِ عزیز کوں مزید مضبوط، خوشحال تے ترقی یافتہ بݨاوݨ دے عزم دی تجدید دا موقع ݙیندے، پاکستان دا قیام برصغیر دے مسلماناں دی طویل جدوجہد، عزم تے لازوال قربانیاں دا ثمر اے، ساݙے اسلاف ہک آزاد وطن دے حصول کیتے بے مثال قربانیاں ݙتیاں، پاکستان بانیانِ پاکستان دے عزم، حوصلے، استقامت تے قربانیاں دی زندہ علامت اے، یومِ آزادی اساکوں اپݨی تاریخ نال وابستگی، قومی ذمہ واریاں دے احساس تے مستقبل کیتے اجتماعی عزم دی تجدید دا درس ݙیندے۔اے ڳالھ انہاں پاکستان دے 79ویں یومِ آزادی دے موقع تے پوری قوم کوں مبارخ ݙیندے آکھی ۔ انھاں آکھیا جو اساکوں ایں عزم دی تجدید کرݨی ہوسی جو ذاتی، سیاسی، لسانی تے علاقائی اختلافات توں اڳوں تھی تے قومی مفاد کوں مقدم رکھیا ونڄے۔ قومی یکجہتی، برداشت، جمہوری تسلسل، آئین دی بالادستی تے قانون دی حکمرانی ہی پاکستان کوں پائیدار ترقی، استحکام تے خوشحالی دی راہ تے گامزن کرسڳدی اے۔انھاں آکھیا جو پاکستان دی سلامتی، خودمختاری تے علاقائی سالمیت دے تحفظ کیتے مسلح افواج تے قانون نافذ کرݨ آلے اداریں ہمیشہ بے مثال قربانیاں پیش کیتیاں ہن، معرکہِ حق دے دوران پاکستانی قوم تے مسلح افواج جیں اتحاد، عزم، حوصلے تے پیشہ ورانہ صلاحیت دا مظاہرہ کیتا، او قومی تاریخ دا ہک روشن باب اے، ایں موقع تے پوری قوم اتحاد تے یکجہتی دا مظاہرہ کریندیں واضح کیتا جو پاکستان دی خودمختاری تے قومی سلامتی دے تحفظ کیتے قوم متحد تے یکسو اے۔سپیکر قومی اسمبلی آکھیا جو ساݙے شہداء دیاں عظیم قربانیاں پوری قوم کیتے مشعلِ راہ ہن سردار ایاز صادق آکھیا جو پاکستان عالمی امن، جھیڑیں دے پرامن حل، مذاکرات تے سفارت کاری دے ودھارے کیتے ہمیشہ ذمہ دارانہ کردار ادا کیتے، اڄوکی علاقائی کشیدگی دے دوران پاکستان دے پاسوں مذاکرات، رابطہ کاری تے سفارتی ذرائع دے ذریعے امن دے ودھارے کیتے کیتیاں ونڄݨ آلیاں کوششاں دا عالمی سطح تے اعتراف کیتا ڳیا، پاکستان ہک ذمہ وار ریاست دی حیثیت نال علاقائی و عالمی امن، استحکام تے بین الاقوامی تعاون دے ودھارے کیتے اپݨا مثبت تے تعمیری کردار جاری رکھیسی۔سپیکر قومی اسمبلی اڄوکے مکہ مشترکہ دفاعی معاہدے کوں پاکستان، سعودی عرب تے ترکیہ وچال اعتماد، تعاون تے مشترکہ سلامتی دے عزم دے پاسوں اہم پیش رفت قرار ݙیندیں آکھیا جو بھرا اسلامی ملکاں وچال دفاعی تعاون تے مشترکہ سلامتی کیتے مربوط اقدامات علاقائی امن و استحکام دے ودھارے اچ معاون ثابت تھیسن۔سپیکر سردار ایاز صادق تحریکِ آزادیِ پاکستان اچ خواتین دے کردار کوں خراجِ تحسین پیش کریندیں آکھیا جو خواتین قیامِ پاکستان دی تحریک دے دوران مرداں دے رلے شریک ریہاں ، انھاں آکھیا جو مادرِ ملت محترمہ فاطمہ جناح، بیگم رعنا لیاقت علی خان، بیگم جہاں آرا شاہنواز تے ٻئی تریمت رہنماواں عوامی اجتماعات تے رابطہ مہمات دے ذریعے تحریکِ آزادیِ پاکستان کوں مضبوط بݨایا، تحریکِ آزادیِ پاکستان دے دوران خواتین دی جدوجہد تے قربانیاں پاکستان دی تاریخ دا ناقابلِ فراموش باب ہن۔انھاں آکھیا جو نوجوان پاکستان دا ساریں توں قیمتی سرمایہ تے ملک دے روشن مستقبل دی ضمانت ہن، نوجواناں کوں معیاری تعلیم، جدید ہنر، تحقیق تے روزگار دے موقع ݙیوݨ ساݙی قومی ترجیح ہووݨی چاہیدی اے۔ سردار ایاز صادق آکھیا جو قائدِ اعظم محمد علی جناحؒ دا تصورِ پاکستان اساکوں اتحاد، ایمان، نظم و ضبط، آئین دی پاسداری، جمہوری اقدار تے قانون دی حکمرانی دا درس ݙیندے، اساکوں قائدِ اعظم محمد علی جناحؒ تے علامہ محمد اقبالؒ دے افکار دی روشنی اچ ایجھا پاکستان تشکیل ݙیوݨا ہوسی جیڑھا مضبوط، خودمختار، جمہوری، آئینی، فلاحی تے معاشی طور تے مستحکم ہووے۔سپیکر قومی اسمبلی یومِ آزادی دے موقع تے کشمیری تے فلسطینی عوام دی حقِ خودارادیت تے آزادی کیتے ݙتیاں ونڄݨ آلیاں لازوال قربانیاں کوں وی خراجِ تحسین پیش کریندیں ہوئیں آکھیا جو پاکستان اپݨی آزادی دیاں خوشیاں اچ انھاں قوماں کوں بُھلا نی سڳدا جیڑھے اڄ وی اپݨے بنیادی حقوق تے آزادی دے حصول کیتے جدوجہد کریندیاں پئن۔ سپیکر قومی اسمبلی دعا کیتی جو اللہ تعالیٰ پاکستان کوں ہمیشہ امن، استحکام، ترقی تے خوشحالی عطا فرماوے، وطنِ عزیز کوں ہر قسم دے اندرلے و ٻاہرلے چیلنجز توں محفوظ رکھے تے ساݙے شہداء و غازیاں دیاں عظیم قربانیاں کوں شرفِ قبولیت عطا فرماوے