پاکستان دے 79ویں یومِ آزادی دے موقع تے ملک اچ جشنِ آزادی دیاں تیاریاں چھیکڑی مرحلے اچ داخل

اسلام آباد۔ 13 اگست (اے پی پی) پاکستان دے 79ویں یومِ آزادی دے موقع تے ملک اچ جشنِ آزادی دیاں تیاریاں چھیکڑی مرحلے اچ داخل تھی ڳئن۔ بازاراں تے شاپنگ سنٹراں اچ سبز ہلالی پرچم، جھنڈیاں، بیجز، ساوے تے چٹے ملبوسات تے ٻئیاں قومی چیزاں دی خریداری کیتے شہریاں دا رش ودھ ڳئے۔تریمتاں ٻالاں دے رلے یومِ آزادی دی خریداری اچ مصروف ہن جݙاں جو ٻال ساوا تے چٹا لباس، قومی پرچم، بیجز تے جھنڈیاں گھنݨ اچ خاص دلچسپی گھندے پئن۔ خواتین دا آکھݨ اے جو یومِ آزادی اساݙے کیتے خوشی تے ماݨ دا ݙینھ اے، ٻالاں نال رل تے ایں ݙینھ دی تیاری کرݨ ہک سوہݨی روایت اے۔ ٻالاں وی 14 اگست بھرپورجوش تے جذبے نال مناوݨ دے عزم دا اظہار کیتا تے آکھیا جو او ساوا تے چٹا لباس پیسن، قومی پرچم لہریسن تے جشنِ آزادی دیاں تقریبات اچ شرکت کریسن۔شہریاں دا آکھݨ اے جو جشنِ آزادی صرف خوشی مناوݨ دا ݙینھ نی بلکہ پاکستان دے قیام کیتے ݙتیاں ڳئیاں قربانیاں کوں یاد کرݨ تے ملک دی ترقی و خوشحالی دے عزم دی تجدید دا موقع وی اے۔ 14 اگست دی آوݨ دے نال ہی ڳلیاں، بازار تے اہم شاہراواں سبز ہلالی پرچم نال سڄ ڳئن تے ہر پاسے جشنِ آزادی دیاں رونقاں نظر آندیاں پئن