پاکستان تے قازقستان دا زرعی تعاون ودھاوݨ تے معاہدیں تے عملدرآمد تکھا کرݨ تے اتفاق

اسلام آباد۔ 13 اگست (اے پی پی) پاکستان تے قازقستان ݙو طرفہ زرعی تعاون کوں نویں سمت ݙیوݨ، موجودہ معاہدیں تے مفاہمتی یادداشتاں تے عملدرآمد تکھا کرݨ تے انھاں کوں ٹھوس تجارتی، سرمایہ کاری تے کاروباری موقعیں اچ تبدیل کرݨ تے اتفاق کیتے۔وزارتِ قومی غذائی تحفظ و تحقیق موجب اے اتفاقِ رائے وفاقی وزیرقومی غذائی تحفظ و تحقیق رانا تنویر حسین تے پاکستان اچ قازقستان دے سفیر یرژان کستافن وچال اسلام آباد اچ تھیوݨ آلی ملاقات دے دوران سامݨے آئے۔ ملاقات اچ زرعی تجارت، غذائی تحفظ، علاقائی رابطیں، زرعی مشینری تے نجی شعبے دے تعاون کوں وسعت ݙیوݨ دے امکانات تے تفصیلی ڳالھ مہاڑ کیتی ڳئی۔ایں موقع تے رانا تنویر حسین آکھیا جو پاکستان تے قازقستان وچال زرعی شعبے اچ ݙو طرفہ اقتصادی تعلقات کوں مزید مستحکم کرݨ دی وسیع استعداد موجود اے۔ انھاں ݙو طرفہ معاہدیں تے نتیجہ خیز انداز اچ عملدرآمد تے قابلِ عمل منصوبیں دے نال نال ادارہ جاتی تے کاروباری رابطیں کوں ودھارا ݙیوݨ تے زور ݙتا۔ݙوہیں ملکاں پاکستان-قازقستان مشترکہ ورکنگ گروپ زراعت دا آندا اجلاس قازقستان اچ منعقد کرݨ تے اتفاق کیتا جیندے اچ سانجھا تعاون اچ پیش رفت دا جائزہ ڳھدا ویسی تے تعاون دے نویں شعبیں دی نشاندہی کیتی ونڄے۔ پاکستان اجلاس اچ شرکت کیتے اپݨا وفد نامزد کریسی۔قازقستان پاکستان کوں کݨک ݙیوݨ اچ دلچسپی دا اظہار کیتا جݙاں جو پاکستانی پاسوں قیمت، معیار تے فراہمی دیاں شرطاں سودھے ملکی ضرورتاں دے تناظر اچ تجویز دا جائزہ گھنݨ تے آمادگی ظاہر کیتی ڳئی۔ ملاقات اچ زرعی تجارت دے ودھارے کیتے علاقائی رابطیں کوں بنیادی اہمیت ݙیوݨ تے وی زور ݙتا ڳیا۔ملاقات دے دوران وسطی ایشیا کوں پاکستان نال رلاوݨ آلے مجوزہ ریلوے تے علاقائی ٹرانسپورٹ رابطیں تے ڳالھ کیتی ڳئی جنھاں کوں مال برداری دے اخراجات گھٹ کرݨ تے زرعی اجناس کیتے نویں منڈیاں تئیں رسائی ودھاوݨ دے حوالے نال اہم قرار ݙتا ڳیا۔ پاکستان امب، امرود، پنڈوں ، کیلے، آلوں تے وسل سودھے اپݨی زرعی اجناس دی برآمدی صلاحیت کوں وی اجاگر کیتا تے قازقستان و وسطی ایشیائی منڈیاں تئیں رسائی ودھاوݨ اچ دلچسپی دا اظہار کیتا۔ ایں ضمن اچ بہتر لاجسٹکس، مارکیٹ تئیں رسائی تے تجارتی سہولت کاری دے موثر عمل کوں اہم قرار ݙتا ڳیا۔زرعی مشینری تے میکانائزیشن بالخصوص چھوٹے تے درمیانے درجے دے کاشتکاراں کیتے گھٹ لاڳت ٹریکٹراں تے جدید زرعی آلات ݙیوݨ تے وی سانجھا تعاون دے ہک اہم ممکنہ شعبے دے طور تے سامݨے آئے۔ ݙوہیں پاسوں متعلقہ اداریں تے نجی شعبے دے نمائندیں کوں ایں شعبے اچ شراکت داری دے امکانات ڳولݨ دی حوصلہ افزائی کرݨ تے اتفاق کیتا ڳیا۔وفاقی وزیر ݙوہیں ملکاں دے زرعی اداریں، تحقیقی مراکز تے کاروباری برادری وچال تکڑے رابطیں دی لوڑھ تے زور ݙتا تاں جو ٹیکنالوجی دے تبادلے، سرمایہ کاری تے مارکیٹ تے مبنی زرعی تعاون کوں ودھارا ݙتا ونڄ سڳے۔ ݙوہیں پاسوں پاکستان تے قازقستان دے سانجھے تعلقات کوں مزید مستحکم کرݨ تے زراعت دے شعبے اچ عملی تعاون کوں نویں رفتار ݙیوݨ دے عزم دا اعادہ کیتا ڳیا جیڑھا ݙوہیں ملکاں دے وسيع تر اقتصادی تے تزویراتی رابطیں کوں مزید تکڑا بݨاوݨ اچ معاون ثابت تھیسی