وزیرِ اعظم شہباز شریف نال ناروے دے وزیرِ خارجہ ایسپن بارتھ ایڈے دی ملاقات

اسلام آباد۔ 13 اگست(اے پی پی)وزیرِ اعظم محمد شہباز شریف ناروے دے ݙو طرفہ تعاون بالخصوص تعلیم، ہنرمند افرادی قوت، موسمیاتی تبدیلیاں دے اثرات نال نمٹݨ دی صلاحیت اتے ٹیکنالوجی دے شعبیاں اچ تعاون دی تعریف کریندے ݙو طرفہ تجارت ودھاوݨ سانڳے پاکستان ولوں دلچسپی ݙکھائی اے۔ وزیرِ اعظم محمد شہباز شریف نال ناروے دے وزیرِ خارجہ ایسپن بارتھ ایڈے وزیرِ اعظم ہاؤس اسلام آباد اچ ملین۔ وزیرِ اعظم ناروے دے وزیرِ خارجہ دا خیرمقدم کیتے اتے پاکستان اتے ناروے دے دوستانہ تعلقات تے اطمینان کیتے۔ انھاں پاکستان دے نال ناروے دے ݙو طرفہ تعاون بالخصوص تعلیم، ہنرمند افرادی قوت، موسمیاتی تبدیلیاں دے اثرات نال نمٹݨ دی صلاحیت (کلائمیٹ ریزیلینس) تے ٹیکنالوجی دے شعبیاں اچ تعاون کوں سراہیا۔ ناروے نال ݙو طرفہ تجارت ودھاوݨ کیتے پاکستان ولوں دپچسپی ݙکھائی اتے نارویجن کمپنیاں کوں پاکستان اچ تیل اتے گیس ڳولݨ کیتے سرمایہ کاری دی دعوت ݙتی۔

علاقائی اتے عالمی صورتحال تے الیندے وزیرِ اعظم فلسطین دی حمایت اچ ناروے دے مضبوط اتے اصولی موقف کوں بھرپور انداز اچ سراہیا۔ انھاں خلیجی خطے اچ امن کیتے پاکستان دیاں کوششاں دی مسلسل حمایت کرݨ تے وی ناروے دا شکریہ ادا کیتا۔ ناروے دے وزیرِ خارجہ پرتباک استقبال تے وزیرِ اعظم دا شکریہ ادا کیتا اتے انھاں کوں ناروے دے وزیرِ اعظم جوناس گہر سٹور ولوں نیک خواہشات پچائن۔ انھاں علاقائی امن دیاں کوششاں اچ پاکستان دے اہم کردار دی تعریف کیتی اتے مختلف شعبیاں اچ ݙو طرفہ تعلقات ٻئے مضبوط ٻݨاوݨ اچ ناروے دی دلچسپی دوہرائی۔ نارویجن وزیرِ خارجہ خاص طور تے ناروے اچ مقیم پاکستانی کمیونٹی دے مثبت کردار کوں سراہیا۔ وزیرِ اعظم ناروے دے وزیرِ اعظم کوں پاکستان دا سرکاری دورہ کرݨ دی دعوت ݙتی۔ ایں موقع تے نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ تجارت جام کمال خان، وزیرِ موسمیاتی تبدیلی ڈاکٹر مصدق ملک، وزیر برائے سمندر پار پاکستانیز و ترقیِ انسانی وسائل چوہدری سالک حسین، وزیرِ اعظم دے معاونِ خصوصی طارق فاطمی اتے ٻئے اعلیٰ حکام وی موجود ہن۔