اسلام آباد۔ 13 اگست (اے پی پی) پاکستان تے ناروے تجارت و سرمایہ کاری، تعلیم، دفاع، موسمیاتی تبدیلی، انفارمیشن ٹیکنالوجی (آئی ٹی) تے بحری امور سودھا باہمی دلچسپی دے کئی شعبیاں اچ تعاون اتے ݙو طرفہ تعلقات ودھاوݨ کیتے ٹھوس اقدامات کرݨ تے اتفاق کیتے۔ اسلام آباد اچ وفود دی سطح تے مذاکرات دے بعد مشترکہ پریس بریفنگ اچ نائب وزیرِ اعظم و وزیرِ خارجہ محمد اسحاق ڈار اتے ناروے …
پاکستان تے ناروے دا تجارت، سرمایہ کاری، آئی ٹی تے موسمیاتی تبدیلی سمیت مختلف شعبیاں اچ ݙو طرفہ تعلقات ودھاوݨ تے اتفاق
اسلام آباد۔ 13 اگست (اے پی پی) پاکستان تے ناروے تجارت و سرمایہ کاری، تعلیم، دفاع، موسمیاتی تبدیلی، انفارمیشن ٹیکنالوجی (آئی ٹی) تے بحری امور سودھا باہمی دلچسپی دے کئی شعبیاں اچ تعاون اتے ݙو طرفہ تعلقات ودھاوݨ کیتے ٹھوس اقدامات کرݨ تے اتفاق کیتے۔ اسلام آباد اچ وفود دی سطح تے مذاکرات دے بعد مشترکہ پریس بریفنگ اچ نائب وزیرِ اعظم و وزیرِ خارجہ محمد اسحاق ڈار اتے ناروے دے وزیرِ خارجہ ایسپن بارتھ ایدے آکھیا جو پاکستان اتے ناروے دی ݙو طرفہ تجارت ایں ویلھے ݙوہیں ملکاں دیاں معیشتاں دی استعداد توں گھٹ اے اتے موثر اقدامات نال ایکوں ٻیا ودھاوݨ دی لوڑھ اے، پاکستان ناروے دیاں کمپنیاں کیتے سرمایہ کاری دے ودھ موقعے پیش کریندے، ایں سانڳے ناروے دیاں کئی معروف کمپنیاں پاکستان اچ سرمایہ کاری کریندیاں پئن۔ انھاں ناروے دی کمپنی یارا انٹرنیشنل تے پاکستان دی ہک مقامی کھاد کمپنی وچال پلانٹ نیوٹریشن دے شعبے اچ ٻݨݨ والے مشترکہ منصوبے کوں ہک مثالی منصوبہ قرار ݙیندے آکھیا جو ݙوھائیں ملکاں وچال تھیوݨ والی ’’گرم جوش، تعمیری اتے جامع‘‘ ڳالھ مہاڑ اچ مختلف وزارتاں وچال زیرِ التواء متعدد معاہدیاں اتے مفاہمت دیاں یادداشتاں (ایم او یوز) کوں تیکھے حتمی شکل ݙیوݨ تے اتفاق کیتا ڳیا۔ پچھلے ݙو سال اچ ناروے کیتے پاکستان دی آئی ٹی برآمدات 5 گنا توں ودھ ودھین۔ نائب وزیرِ اعظم آکھیا جو پاکستان اتے ناروے عوامی سطح تے رابطے ودھاوݨ تے وی اتفاق کیتے، ݙوہائیں ملکاں وچال تعاون ودھاوݨ کیتے پاکستان دی سینیٹ اتے قومی اسمبلی اچ پاک-ناروے پارلیمانی دوستی گروپس وی قائم کیتے ڳئن۔ انھاں آکھیا جو فریقین پاکستان دی ہنرمند افرادی قوت کیتے قانونی رستیاں تے کام جاری رکھݨ تے وی متفق ہن ڄݙاں جو انسانی سمگلنگ اتے غیر قانونی نقل مکانی دے تدارک تے زور ݙتا ڳیا۔ نائب وزیرِ اعظم ناروے دے وزیرِ خارجہ کوں امریکہ تے ایران دے تنازعے دے حوالے نال مذاکرات، کشیدگی اچ کمی اتے پرامن حل سانڳے پاکستان دیاں سفارتی کوششاں دا وی ݙسایا۔ نائب وزیرِ اعظم محمد اسحاق ڈار پاکستان، ترکیہ تے سعودی عرب دے مکہ مشترکہ دفاعی معاہدے دی تفصیلات وی ݙسائن۔ ناروے دے وزیرِ خارجہ ایسپن بارتھ ایدے ای ایف ٹی اے-پاکستان فریم ورک دے ذریعے تجارتی تعلقات ٻئے ودھاوݨ دی حمایت کیتی۔ انھاں ایران اتے اسرائیلی-امریکی حملے دے بعد امن مذاکرات اچ سہولت کاری کیتے پاکستان دے کردار دی تعریف کیتی۔ انہاں پاکستان دے شدید سیلاباں نال متاثر تھیوݨ دی نشاندہی کریندے مسلح تنازعات مکاوݨ تے زور ݙتے تاں جو عالمی توجہ موسمیاتی تبدیلی، قدرتی ماحول دے تحفظ، عالمی صحت اتے غربت مکاوݨ ڄھئیں مشترکہ چیلنجز دی پاسداری تے رہوے۔
