چوݙاں اگست انھاں قربانیاں کوں یاد کرݨ دا ݙینھ اے جنھاں پاروں پاکستان دا قیام ممکن تھیا، صدر آصف علی زرداری دا یومِ آزادی تے پیغام

اسلام آباد۔ 14 اگست (اے پی پی) صدرِ مملکت آصف علی زرداری پاکستان دے 79ویں یومِ آزادی دے موقع تے اندرلے ملک تے ٻاہرلے ملک رہݨ آلے سارے پاکستانیاں کوں دلی مبارخ ݙیندے آکھیے جو 14 اگست او ݙینھ اے جݙاں اساں انھاں قربانیاں کوں یاد کریندوں جنھاں دی بدولت پاکستان دا قیام ممکن تھیا۔صدرِ مملکت یومِ آزادی دے موقع تے اپݨے پیغام اچ آکھیا جو اساں قائدِ اعظم محمد علی جناح، تحریکِ پاکستان دے رہنماواں و کارکناں تے انھاں سارے لوکاں کوں خراجِ تحسین پیش کریندوں جنھاں ہک آزاد وطن دے حصول دی جدوجہد اچ اپݨے گھر ٻار تے روزگار تئیں چھوڑ ݙتے۔ انھاں آکھیا جو آزادی صرف ہک تاریخی کامیابی نی بلکہ ہک ذمہ واری وی اے جینکوں ہر نسل اڳوں ودھاوݨا اے، عوام دی جمہوری خواہش دے نتیجے اچ وجود اچ آوݨ آلے پاکستان کوں مزید مضبوط، محفوظ تے خوشحال بݨاوݨا ہوسی۔صدرِ مملکت آکھیا جو ساݙی ذمہ واری صرف اے یاد رکھݨا نی جو پچھلیاں نسلاں کیا حاصل کیتا بلکہ اپݨی محنت نال ایندے اچ مزید ودھارا کرݨا وی اے، گزریل سال اساکوں پاکستانی قوم دی طاقت دا احساس ݙوائے۔ انھاں آکھیا جو معرکہِ حق ثابت کیتا جو پاکستان امن چاہندے لیکن اپݨی خودمختاری تے قومی مفادات دے دفاع دے عزم تے صلاحیت نال وی مالا مال اے۔صدرِ مملکت آصف علی زرداری آکھیا جو طاقت دا اصل سبق ذمہ واری دا سبق اے، جیڑھا ملک اپݨا دفاع کر سڳدے اونکوں اپݨی طاقت کوں جھیڑے توں بچاوݨ، امن دے تحفظ تے اپݨے عوام دے مفادات کیتے وی استعمال کرݨا چاہیدے۔ انھاں آکھیا جو اڄ اساکوں جو امن تے استحکام حاصل اے، ایندے کیتے وݙی قیمت ادا کیتی ڳئی اے۔صدرِ مملکت آکھیا جو ایں یومِ آزادی تے اساں اپݨی مسلح افواج، قانون نافذ کرݨ آلے ادارے تے پولیس دے شہداء کوں خراجِ تحسین پیش کریندوں تے انھاں دے اہل خانہ دیاں قربانیاں کوں وی سلام پیش کریندوں، انھاں دی بہادری تے عزم ٻاہرلی جارحیت تے دہشت گردی دے خطرے توں ساݙی قوم دے تحفظ اچ اہم کردار ادا کیتے، پاکستانی قوم انھاں دیاں خدمات دی تہہِ دل نال شکر گزار اے۔صدرِ مملکت آکھیا جو خطے اچ مذاکرات دیاں کوششاں کوں اڳوں ودھاوݨ کیتے پاکستان دا کردار وی ایں ذمہ واری دی ہک اہم مثال اے، پاکستان ایجھے ویلھے اچ جݙاں وسيع تر جھیڑے دے خطے تے دنیا تے سنگین اثرات مرتب تھی سڳدن، اپݨے رابطیں، جغرافیائی محلِ وقوع تے سفارتی اثر و رسوخ کوں موثر انداز اچ استعمال کریندیں مذاکرات تے کشیدگی اچ کمی دی حوصلہ افزائی کیتی۔انھاں آکھیا جو پاکستان دا موقف واضح اے، ساݙا یقین اے جو جھیڑے بھاویں کتنے ہی سنگین کیوں نہ ہوون، بالآخر انھاں کوں مذاکرات تے سفارت کاری دے ذریعے حل کیتا ونڄݨا چاہیدے۔ ساݙی سلامتی ساݙے پڑوس تے پوری دنیا دے امن تے استحکام نال جڑی ہوئی اے، پاکستان کشیدگی گھٹ کرݨ، علاقائی استحکام دے تحفظ تے تعاون کیتے سازگار ماحول پیدا کرݨ دیاں کوششاں دی حمایت جاری رکھیسی۔صدرِ مملکت آکھیا جو اے ویلھا ملک دے اندرلے معاملیں تے توجہ ݙیوݨ تے انھاں کماں تے توجہ مرکوز کرݨ دا وی اے جیڑھے پاکستان دے مستقبل دا تعین کریسن، اساکوں اپݨی معیشت کوں تکڑا بݨاوݨا ہوسی، نوجواناں کیتے زیادہ موقع پیدا کرݨے ہوسن، تعلیم تے ہنر کوں بہتر بݨاوݨا ہوسی تے گورننس، معیشت تے معاشرے اچ اصلاحات دے ذریعے اداریں کوں مضبوط کرݨا ہوسی تاں جو ترقی تے جمہوریت دے ثمرات ملک دے ہر حصے تے ہر طبقے تئیں پڄ سڳن۔انھاں آکھیا جو پاکستان دی ساریں توں وݙی طاقت ایندے نوجوان ہن، ملک تے دنیا دے مختلف حصیں اچ او سائنس، ٹیکنالوجی، کاروبار، تعلیم تے تخلیقی شعبیں اچ اپݨی صلاحیتاں دا مظاہرہ کریندے پئن، ساݙی ذمہ واری اے جو انھاں کوں اوتعلیم، ہنر تے موقع ݙیوں جنھاں دے ذریعے او اپݨی صلاحیتاں کوں کارِ آمد بݨا سڳن، اڄ نوجواناں تے سرمایہ کاری دراصل پاکستان دے مستقبل تے سرمایہ کاری اے۔صدرِ مملکت آکھیا جو عام پاکستانیاں کیتے قومی ترقی کوں عملی بنیاداں تے پرکھیا ویندے، ایندا مطلب اے جو ہک نوجوان کوں اپݨا کیریئر بݨاوݨ کیتے ہنر سکھݨ تے اڳوں ودھݨ دا موقع ملے، ایندا مطلب اے جو ہک خاندان معیاری تعلیم تے صحت دیاں سہولتاں تئیں رسائی حاصل کر سڳے، ایندا مطلب اے جو کسان، مزدور، تاجر تے کاروباری لوک زیادہ اعتماد دے نال مستقبل دی منصوبہ بندی کر سڳن۔ انھاں آکھیا جو پاکستان دی طاقت دا اصل اندازہ ایں ڳالھ توں ہوسی جو ساݙی قومی ترقی ایندے عوام دی زندگیاں اچ کتنی بہتری گھن آندی اے۔صدرِ مملکت بھارتی غیر قانونی زیرِ تسلط جموں و کشمیر دے عوام دے نال وی اپݨی یکجہتی دا اعادہ کریندیں آکھیا جو انھاں دے حقوق کیتے جائز جدوجہد دی حمایت جاری رکھݨ دا عزم کریندوں، پاکستان جھیڑا جموں و کشمیر دے پرامن حل کیتے کشمیری عوام دی خواہشات تے اقوامِ متحدہ دیاں متعلقہ قرارداداں دے مطابق اپݨی حمایت جاری رکھیسی۔انھاں آکھیا جو ایں موقع تے میں اے وی واضح کرݨا چاہندں جو تاریخی اختلافات دے باوجود اساں ہمیشہ اپݨے ہمسائے افغانستان دی قومی خودمختاری دا احترام تے حمایت کیتی اے تے انھاں توں وی ایں ہی رویے دی توقع رکھیندوں، اے امر افسوسناک اے جو افغانستان دی موجودہ عبوری حکومت دہشت گرد گروہاں دے ہک مجموعے کوں اپݨی سرزمین استعمال کرݨ تے پاکستان سودھے ہمسایہ ملکاں دے خلاف حملے کرݨ دی اجازت ݙیندی پئی اے تے انھاں دی حمایت کریندی پئی اے۔انھاں آکھیا جو اے وی افسوسناک اے جو افغانستان دے طالبان حکمران پاکستانی شہریاں تے سکیورٹی اہلکاراں دے خلاف دہشت گرد حملیں اچ بھارت دے نال تعاون کریندے پئن، او ایجھا پاکستان دی امن دے قیام دیاں کوششاں توں توجہ ہٹاوݨ کیتے کریندے پئن جنھاں کوں پوری دنیا تسلیم کریندی اے۔ صدر آصف علی زرداری آکھیا جو میں انھاں کوں خبردار کرینداں جو پاکستانی عوام دے خلاف اے شرپسندانہ کارروائیاں بند کرن تے ساریں کوں یقین ݙوینداں جو پاکستان دی مسلح افواج انھاں مذموم عزائم کوں شکست ݙیوݨ دی پوری صلاحیت رکھیندی اے ۔انھاں آکھیا جو ایں یومِ طریقہ تے میں سارے پاکستانیاں توں اپیل کرینداں جو او جیں وی شعبے اچ خدمات انجام ݙیندے پئن، ملک دی ترقی اچ اپݨا کردار ادا کرن۔ انھاں دعا کیتی جو اللہ تعالیٰ پاکستان دی حفاظت فرماوے، ساݙے عوام کوں امن تے خوشحالی عطا کرے، ساݙے ملک کوں تکڑا بݨاوے تے بہتر مستقبل دے پاسے ساݙی رہنمائی فرماوے