پنچائت تے مصالحت ساݙے دینی تے سماجی ورثے دا حصہ ہن، اعظم نذیر تارڑ

اسلام آباد۔21اگست (اے پی پی) وفاقی وزیرقانون و انصاف سینیٹر اعظم نذیر تارڑ آکھیے جو پنچائت تے مصالحت ساݙے دینی تے سماجی ورثے دا حصہ ہن، علماء کرام مصالحتی نظام کوں اڳوں ودھاوݨ وچ زیادہ موثر کردار ادا کر سڳدن، حکومت ایہو جیہے قانون متعارف کرویندی پئی اے جیں دے تحت جھیڑے عدالتاں تئیں پڄݨ توں پہلے ہی حل کیتے ونڄ سڳن۔ انہاں ایں ڳالھ دا اظہار سول، کمرشل تے شریعہ موجب ثالثی دے پنج ݙینھوارے تربیتی پروگرام دے دورے دے موقع تے آکھی۔ تربیتی پروگرام انٹرنیشنل میڈی ایشن اینڈ آربیٹریشن سینٹر (آئی میک) تے او آئی سی آربیٹریشن سینٹر دے تعاون نال کرایا ویندا پئے، جیں وچ علماء کرام کوں سول، کمرشل تے شریعہ دے موجب ثالثی دے مختلف پہلواں بارے تربیت ݙتی ویندی پئی اے۔وفاقی وزیر آکھیا جو دنیا بدلدی پئی اے تے مصالحتی نظام تکھے کھنڈا پئے، جݙاں جو عالمی سطح تے وی قانونی فریم ورک وچ مصالحت کوں زیادہ اہمیت ݙتی ویندی پئی اے۔ انہاں آکھیا جو مصالحت دی بنیاد ساݙے دین وچ موجود اے، علماء کرام ایں کوں نیکی سمجھ تے اڳوں ودھاون۔ سینیٹراعظم نذیر تارڑ آکھیا جو کجھ معاملیں وچ مقدمہ درج کراوݨ توں پہلے مصالحت کوں لازمی قرار ݙتا ویندا پئے، ٹیکس دے جھیڑیں وچ متعلقہ سرکاری ادارے عدالت ونڄݨ توں پہلے سانجھی مصالحت کریندے پئن تے ٹیکس دے کئی مسئلے عدالتاں توں ٻاہروں حل تھیوݨ لڳ ڳئن