قومی اسمبلی وچ وزارتِ سائنس تے ٹیکنالوجی بارے سوال تے متعلقہ وزیر تے پارلیمانی سیکرٹری دی عدم موجودگی دا نوٹس، سپیکر قومی اسمبلی سیکرٹری وزارت کوں سݙ ڳھدا

اسلام آباد۔21اگست (اے پی پی) قومی اسمبلی وچ وزارتِ سائنس تے ٹیکنالوجی بارے سوال تے متعلقہ وزیر تے پارلیمانی سیکرٹری دی عدم موجودگی دا نوٹس گھندے سپیکرقومی اسمبلی سیکرٹری وزارت کوں سݙ ڳھدا جݙاں جو وزیرِ پارلیمانی امور آکھیا جو او وزراء دے ایں طرزِعمل کوں وزیرِاعظم دے نوٹس وچ گھن آسن تاں جو انہاں دے خلاف تادیبی کارروائی کیتی ونڄے۔ قومی اسمبلی وچ آسیہ ناز تنولی دے وزارتِ سائنس تے ٹیکنالوجی بارے سوال تے وزیر دی عدم موجودگی، کہیں ݙوجھے وزیر کوں بزنس توں نہ ݙساوݨ تے نوٹس گھندے سپیکر ایوان وچ موجود وزارت دے جوائنٹ سیکرٹری کوں بھیج تے سیکرٹری وزارت کوں سݙ ڳھدا۔انہاں آکھیا جو او شام تئیں اتھاں تشریف فرما ہوسن۔ سپیکروزیرِ پارلیمانی امور کوں آکھیا جو گزریل ݙینھ وی مختلف وزارتاں دے سوالاں دے جواب نی آئے، جیں تے سیکرٹری کوں وی سݙیا ڳیا ہئی ۔ اتھاں سوالاں دے جواب ݙیوݨ کابینہ دی اجتماعی ذمہ واری اے۔ ڈاکٹر طارق فضل چوہدری آکھیا جو وزراء کوں فرداً فرداً انہاں دے ایوان وچ بزنس بارے ݙسا ݙتا ویندے، ایں دے باوجود وزراء دا غیر ذمہ دارانہ رویہ اے۔ وزیرِاعظم توں استدعا کیتی ویسی جو او ایہو جیھی غیر ذمہ داری تے تادیبی کارروائی کرن، سیشن شروع تھیوݨ توں پنج منٹ پہلے ایوان دے بزنس توں آگاہ کیتا ویندے، تاں جو اڄ اساکوں متعلقہ وزارت دی طرفوں نی ݙسایا ڳیا ۔ سپیکر انہاں کوں ہدایت کیتی جو او تحریری طور تے ایں بارے ݙساون