پاکستان دہشت گردی دے خلاف جنگ وچ آپݨے خون تے وسائل دی مسلسل بے مثال قربانی ݙیندا پئے، ترجمان دفترِ خارجہ

اسلام آباد۔21اگست (اے پی پی) ترجمان دفترِ خارجہ آکھیے جو پاکستان دہشت گردی دے خلاف جنگ وچ آپݨے خون تے وسائل دی مسلسل بے مثال قربانی ݙیندا پئے، پاکستان دہشت گردی دی ہر شکل تے ہر مظہر دے خلاف جنگ لڑݨ دے آپݨے عزم وچ غیر متزلزل تے آپݨی وابستگی وچ ثابت قدم اے۔دہشت گردی دے متاثرین دی یاد تے انہاں کوں خراجِ عقیدت پیش کرݨ دے عالمی ݙینھ دے موقع تے ترجمان دفترِ خارجہ توں جاری بیان وچ آکھیا ڳئے جو پاکستان دنیا دیاں قوماں نال رل تے دہشت گردی دے متاثرین دی یاد تے انہاں کوں خراجِ عقیدت پیش کرݨ دا عالمی ݙینھ منیندا پئے۔ انہاں آکھیا جو اے ݙینھ محض ہک رسمی تقریب دا ݙینھ نی بلکہ دہشت گردی دے خلاف جدوجہد وچ جاناں دا نذرانہ پیش کرݨ آلیں تے متاثرین دے خانداناں دی طرفوں ادا کیتی ونڄݨ آلی باری قیمت کوں خراجِ عقیدت پیش کرݨ تے ایں دا حقیقت پسندانہ جائزہ گھنݨ دا موقع وی اے۔ترجمان آکھیا جو اے ݙینھ اساکوں ایں عالمی چیلنج دے خلاف مسلسل چوکس رہݨ تے پرعزم جدوجہد دے آپݨے غیر متزلزل عزم تے غور کرݨ تے ایں کوں مزید مستحکم کرݨ دا موقع ݙیندے۔ انہاں آکھیا جو پاکستان دہشت گردی دے خلاف جنگ وچ آپݨے خون تے وسائل دی مسلسل بے مثال قربانی ݙیندا پئے تے اے جدوجہد صرف آپݨے لوکاں کیتے نی بلکہ خطے تے ایں توں ٻاہروں وی امن تے سلامتی کیتے اے۔ ترجمان آکھیا جو دہشت گردی دے خلاف جاری جنگ وچ 90 ہزار توں ودھ پاکستانی آپݨیاں جاناں توں ہتھ دھووݨے پئن جݙاں جو ملک کوں 150 ارب ڈالر توں ودھ دا معاشی ضیان دا سامنا کرݨا پئے۔ انہاں آکھیا جو دہشت گردی ہݨ کئی جہتاں تے مشتمل خطرہ بݨ چکی اے جتھاں دہشت گرد زیادہ اوکھے تے مہلک حملیں کیتے آپݨی رسائی ودھاوݨ دی غرض نال ابھردی ہوئی ٹیکنالوجیز تے سائبر سپیس دا استعمال کریندے پئن۔ترجمان مزید آکھیا جو پاکستان کوں گمراہ کن تے کوڑی معلومات تے مبنی مہم، ہائیڈرو ٹیررازم تے ماورائے علاقائی ٹارگٹ کلنگ دیاں مہمات دا وی سامݨا اے۔ انہاں آکھیا جو سال 2025ء پاکستان کیتے گزریل ہک ݙہاکے دے دوران خونریز ترین سالاں وچ شامل رہیے، ودھدے جانی ضیان دے پسِ پشت تشدد دا ہک واقف تے انتہائی سنگین نمونہ کارفرما اے جیں دی منصوبہ بندی، مالی معاونت تے ہدایات سرحد پار موجود محفوظ ٹھکاݨیں توں کیتی ویندی اے جݙاں جو اکثر ہمسائے ملکاں دے دشمن عناصر وی ایں وچ معاونت کریندن۔ ترجمان آکھیا جو انہاں کارروائیاں وچ نمازیاں، ٻالاں، عورتاں تے سکیورٹی اہلکاراں کوں بلا امتیاز نشانہ بݨایا ویندے۔انہاں آکھیا جو انہاں چیلنجز دے باوجود پاکستان دہشت گردی دی ہر شکل تے ہر مظہر دے خلاف جنگ لڑݨ دے آپݨے عزم وچ غیر متزلزل تے آپݨی وابستگی وچ ثابت قدم اے، ایں ݙینھ اساں مقبوضہ جموں و کشمیر وچ آپݨے کشمیری بھراواں نال وی یکجہتی دا اظہار تے انہاں کوں خراجِ عقیدت پیش کریندوں جیڑھے مسلسل منظم ریاستی جبر دا سامݨا کریندے پئن۔ ترجمان آکھیا جو ایں جبر وچ سخت گیر قانون، جبری گمشدگیاں تے من منیاں گرفتاریاں شامل ہن جݙاں جو ریاستی سرپرستی وچ جاری اے مہم دہشت گردی دی ہر تعریف تے پورا لہندی اے۔انہاں آکھیا جو کئی ݙہاکیں تے محیط جبر تے انہاں دے بنیادی انسانی حقوق دی مسلسل تے کھلی خلاف ورزیاں دے باوجود مقبوضہ جموں و کشمیر دے لوک اقوامِ متحدہ دی طرفوں تسلیم شدہ حقِ خودارادیت دے آپݨے مطالبے تے ثابت قدم ہن۔ انہاں آکھیا جو فلسطین دے لوک وی ساݙی سوچ تے دعاواں وچ شامل ہن، جنگ بندی تے سفارتی کوششاں دے نتیجے وچ اگرچہ کجھ انسانی امداد دی گنجائش پیدا تھئی اے تاں جو فلسطینی لوک بالخصوص ٻال، عورتاں تے بزرگ بدستور ناقابلِ بیان انسانی حقوق دی پامالیاں تے حقِ خودارادیت توں محرومی دا شکار ہن، ایں تناظر وچ ماضی دے عالمی تجربے اڄ وی ساݙے کیتے اہم سبق رکھیندن۔ترجمان آکھیا جو غیر ملکی قبضہ، حل طلب جھیڑے تے حقِ خودارادیت توں محرومی کوں انتہا پسند تے دہشت گرد عناصر آپݨے مقصد کیتے استعمال کریندن جیں دے تدارک کیتے وقتی اقدامات ناگزیر ہن۔ بیان وچ مزید آکھیا ڳئے جو دہشت گردی دے متاثرین کوں خراجِ عقیدت پیش کریندے اساں عالمی برادری تے زور ݙیندوں جو دنیا وچ دہشت گردی دے متاثرین تے ایں توں بچ ونڄݨ آلے لوکاں دی بلا امتیاز حمایت کیتی ونڄے۔ ایں دے نال نال بین الاقوامی تعاون تے مکالمے کوں معروضی، غیر جانبدار، مستقل تے منصفانہ انداز وچ کہیں دوہرے معیار دے بغیر مزید ودھارا ݙتا ونڄے تاں جو ساݙیاں آوݨ آلیاں نسلاں کیتے ہک زیادہ پرامن دنیا کوں یقینی بݨایا ونڄ سڳے۔