چیئرمین سینیٹ یوسف رضا گیلانی نال ملائیشیا دے وزیرِ داخلہ دی وفد نال ملاقات، پاکستان تے ملائیشیا وچال پارلیمانی، سیاسی، اقتصادی، تعلیمی تے دفاعی رابطے مزید ودھاوݨ تے اتفاق

اسلام آباد۔21اگست (اے پی پی) چیئرمین سینیٹ سید یوسف رضا گیلانی نال ملائیشیا دے وزیرِداخلہ داتوک سری سیف الدین نصر بن اسماعیل وفد نال پارلیمنٹ ہاؤس وچ ملاقات کیتی جیں وچ پاکستان تے ملائیشیا وچال پارلیمانی، سیاسی، اقتصادی، تعلیمی تے دفاعی رابطے مزید ودھاوݨ تے اتفاق کیتا ڳیا۔سینیٹ سیکرٹریٹ موجب چیئرمین سینیٹ ملائیشیا دے وزیرِداخلہ دا پرتپاک خیرمقدم کریندے آکھیا جو پاکستان تے ملائیشیا دے تعلقات تاریخی، برادرانہ تے مشترکہ مذہبی و ثقافتی اقدار تے استوار ہن جݙاں جو اعلیٰ سطحی دوریں دے تبادلے نال ݙوہیں ملکاں دے تعلقات کوں نویں تقویت ملی اے۔ انہاں آکھیا جو پاکستان ملائیشیا دے معزز بادشاہ تے ملکہ دے پاکستان آوݨ دا منتظر اے تے ملائیشیا دے وزیرِ خارجہ دے وقتی دورہِ پاکستان دا وی خواہاں اے۔ انہاں مشترکہ وزارتی کمیشن دے آندے اجلاس دے وقتی انعقاد دی امید ظاہر کریندے قیدیاں دی بین الاقوامی منتقلی دے معاہدے تے دستخط دا خیرمقدم کیتا۔سید یوسف رضا گیلانی آکھیا جو پاکستان تے ملائیشیا دے بہترین سیاسی تعلقات کوں تکڑے تجارتی و اقتصادی شراکت داری وچ تبدیل کرݨا ہوسی، ملائیشین سرمایہ کار پاکستان وچ سرمایہ کاری دے وسیع موقعیں توں فیدہ چاون جݙاں جو خصوصی سرمایہ کاری سہولت کونسل (ایس آئی ایف سی) غیر ملکی سرمایہ کاری دے ودھارے کیتے موثر ون ونڈو پلیٹ فارم اے۔ انہاں آکھیا جو پاکستان ملائیشین کاروباری اداریں کیتے افغانستان، وسطی ایشیا تے مغربی چین تئیں رسائی دا ٻوہا  بݨ سڳدے، پاکستان تے ملائیشیا وچال سیمی کنڈکٹر دے شعبے وچ تعاون دے وی وسیع امکانات موجود ہن۔چیئرمین سینیٹ آکھیا جو پاکستان دی تقریباً 60 فیصد آبادی نوجواناں تے مشتمل اے تے نوجوان ملک دا بہترین اثاثہ ہن، پاکستان ملائیشیا دی افرادی قوت دی ضرورتاں پوریاں کرݨ وچ آپݨا کردار ادا کرݨ کیتے تیار اے۔ انہاں پاک ملائیشیا دفاعی تعاون وچ مسلسل پیشرفت کوں قابلِ تحسین قرار ݙیندے آکھیا جو پاکستان دفاعی پیداوار دے شعبے وچ تعاون ودھاوݨ تے ملائیشیا دی ضرورتاں موجب دفاعی سازوسامان ݙیوݨ کیتے تیار اے۔ ایں موقع تے ملائیشیا دے وزیرِ داخلہ داتوک سری سیف الدین نصر بن اسماعیل آکھیا جو ملائیشیا پاکستان دے نال تعلقات تے سانجھے تعاون کوں مزید مستحکم کرݨ چاہندے۔ ملاقات وچ ݙوہیں ملکاں وچال پارلیمانی، سیاسی، اقتصادی، تعلیمی تے دفاعی رابطیں کوں مزید ودھاوݨ دے عزم دا اعادہ کیتا ڳئے۔