بی ایف سی اسلام آباد وچ سال دے دوران کاروبار و سرمایہ کاری بارے 7709 درخواستاں ملیاں، قیصر احمد شیخ

اسلام آباد۔24اگست (اے پی پی) وفاقی وزیر بورڈ آف انویسٹمنٹ قیصر احمد شیخ آکھیے جو کاروباری سہولت کاری مرکز (بی ایف سی) اسلام آباد سرمایہ کاراں تے کاروباری لوکاں کوں ہک ہی چھت تلے سرکاری خدمات ݙیوݨ دے ذریعے کاروباری ماحول کوں سوکھا تے سرمایہ کاری دوست بݨاوݨ وچ اہم کردار ادا کریندا پئے۔ اے ڳالھ انہاں بی ایف سی اسلام آباد دے دورے، مرکز دی ہک سالہ کارکردگی تے کاروباری سہولت کاری دے نتیجے دے جائزے توں بعد میڈیا کوں آکھی۔انہاں ݙسیا جو بی ایف سی اسلام آباد وچ ہک سال دے دوران کاروباری و سرمایہ کاری متعلق 7,709 درخواستاں ملیاں ، مرکز دے ذریعے 6,896 رجسٹریشنز، لائسنسز، سرٹیفکیٹس تے ٻئے اجازت نامے جاری کیتے ڳئن۔ قیصراحمد شیخ آکھیا جو بی ایف سی 4,920 درخواستاں کوں مقررہ مدت دے اندر نبیڑیا جݙاں جو ہک سال دے دوران 4,100 توں ودھ نویں کاروباراں کوں سہولت ݙتی ڳئی۔ انہاں آکھیا جو بی ایف سی دی سہولت کاری دے نتیجے وچ 6.6 ارب روپے توں ودھ دی سرمایہ کاری ممکن تھئی تے 20 ہزار توں ودھ روزگار دے موقع دی سہولت کاری کیتی ڳئی۔وفاقی وزیر موجب ہک سال دے دوران بی ایف سی اسلام آباد وچ 8,554 افراد دی آونڄ ریکارڈ کیتی ڳئی جݙاں جو 845 کیسز وچ ماہرین دی خصوصی رہنمائی ݙتی ڳئی۔ انہاں آکھیا جو دسمبر 2025 وچ ساریں توں ودھ 1,288 درخواستاں ملیاں ۔ انہاں دا آکھݨ ہئی جو کاروباری سہولت کاری مرکز سرمایہ کاراں تے کاروباری لوکاں کوں مختلف سرکاری شعبیں متعلق خدمات ہک ہی جاہ تے ݙیندا پئے جیں نال انہاں کوں دفتراں دے چکر لاوݨ تے اوکھے طریقہ کار توں نجات ملدی پئی اے۔قیصر احمد شیخ آکھیا جو حکومت کاروبار تے سرمایہ کاری دے ودھارے کیتے طریقہ کار کوں سوکھا تے سہولت کاری دے نظام کوں مزید مؤثر بݨیندی پئی اے، بی ایف سی دا ہک سالہ کامیاب آپریشن سرمایہ کار دوست ماحول دے قیام دے پاسے اہم پیش رفت آے۔ وفاقی وزیر آکھیا جو وزیراعظم محمد شہباز شریف دی قیادت وچ حکومت سرمایہ کاری تے کاروبار دے ودھارے کیتے عملی اقدامات کریندی پئی اے تے ون ونڈو سہولت دے ذریعے کاروباری لوکاں کوں ودھ توں ودھ سوکھ ݙتی ویندی پئی اے