وفاقی وزیر مصطفیٰ کمال نال وزیرِ خزانہ دے مشیر عدنان پاشا دی ملاقات

اسلام آباد۔24اگست (اے پی پی) وفاقی وزیرِ صحت مصطفیٰ کمال نال وفاقی وزیرِ خزانہ دے مشیر عدنان پاشا ملاقات کیتی۔ ملاقات وچ ایڈیشنل سیکرٹری ہیلتھ، ڈائریکٹر جنرل ہیلتھ، ڈائریکٹر جنرل پاپولیشن سودھے ٻئے متعلقہ حکام شرکت کیتی۔ ملاقات دے دوران عدنان پاشا نیوٹریشن تے سٹنٹنگ متعلق نویں منصوبے دے حوالے نال وفاقی وزیرِ صحت کوں تفصیلی بریفنگ ݙتی۔ایں موقع تے ڳالھ کریندے وفاقی وزیر مصطفیٰ کمال آکھیا جو ماء تے ٻال دی صحت براہِ راست غذائیت نال جڑی ہوئی اے، غذائی قلت تے قابو پاتے بغیر صحت دے مطلوبہ اہداف حاصل نی کیتے ونڄ سڳدے۔ انہاں آکھیا جو پاکستان وچ ہر سال تقریباً 11 ہزار ماواں زچگی دے دوران جان توں ہتھ دھوویندن جݙاں جو ٻالاں وچ غذائی قلت پاروں تقریباً 43 فیصد ٻال سٹنٹنگ دا شکار ہن۔وفاقی وزیرِ صحت آکھیا جو ماء دی مناسب غذائیت صحت مند ٻال دی بنیاد اے جݙاں جو صحت مند ٻال ہی صحت مند تے مضبوط معاشرے دی بنیاد بݨدن۔ مصطفیٰ کمال ہدایت کیتی جو غذائی قلت تے قابو پاوݨ، سٹنٹنگ دی شرح گھٹ کرݨ تے ماں و ٻال دی صحت دے اشاریں وچ بہتری کیتے قابلِ عمل سفارشات تے مربوط حکمتِ عملی مرتب کیتی ونڄے۔ انہاں آکھیا جو غذائیت دے مسئلیں نال نبڑݨ کیتے سارے متعلقہ اداریں وچال موثر رابطہ تے مربوط اقدامات ضروری ہن تاں جوماء تے ٻال دی صحت دے حوالے نال پائیدار بہتری آندی ونڄے۔