وزیراعظم محمد شہباز شریف دی موڈیز دی طرفوں پاکستان دی کریڈٹ ریٹنگ Caa1 توں ودھاتے B3 کرݨ تے قوم کوں مبارخ

اسلام آباد۔24اگست (اے پی پی) وزیراعظم محمد شہباز شریف موڈیز دی طرفوں پاکستان دی کریڈٹ ریٹنگ Caa1 توں ودھاتے B3 کرݨ تے قوم کوں مبارخ ݙتی اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف موڈیز دی طرفوں پاکستان دی خودمختارکریڈٹ ریٹنگ وچ بہتری دا خیرمقدم کریندے ہوئیں حکومتی معاشی ٹیم دیاں کوششاں دی پذیرائی کیتی۔انہاں آکھیا جو نائب وزیراعظم و وزیرِ خارجہ سینیٹر محمد اسحاق ڈار، آرمی چیف و چیف آف ڈیفنس فورسز فیلڈ مارشل سید عاصم منیر، وزیرِ خزانہ محمد اورنگزیب تے سارے متعلقہ وزراء و حکام ایں ڳالھ کیتے لائقِ تحسین ہن۔ وزیراعظم آکھیا جو پاکستان دی کریڈٹ ریٹنگ وچ بہتری حکومت دی معاشی پالیسیاں تے اصلاحات تے عالمی اعتماد دا مظہر اے، بین الاقوامی مالیاتی اداریں تے ریٹنگ ایجنسیاں دی طرفوں پاکستان دی معاشی صورتحال وچ بہتری دا اعتراف خوش آئند اے۔انہاں آکھیا جو پاکستان دی معیشت استحکام دی جانب گامزن اے، بین الاقوامی اداریں دی طرفوں ریٹنگ وچ بہتری ایں دا واضح ثبوت اے، حکومت معیشت کوں مستحکم کرݨ تے ٻاہرلے شعبے وچ بہتری کیتے موثر اقدامات کیتے۔ وزیراعظم آکھیا جو معاشی استحکام کیتے حکومت دی مسلسل محنت تے اصلاحات دے نتیجے وچ عالمی اداریں دا پاکستان تے اعتماد ودھدا پئے، پاکستان دی معیشت کوں پائیدار بنیاداں تے استوار کرݨ کیتے حکومت اصلاحات دا عمل مزید تکھا کریسی، ساݙی منزل پاکستان کوں ہک مضبوط، خودکفیل تے پائیدار معیشت بݨاوݨ اے۔